09.08.2026 | 18:10
Արարատի մարզի քրեական և Վեդիի համայնքային ոստիկանները դանակահարության դեպք են բացահայտել
ՌԴ-ի կողմից ուկրաինական պատերազմին մասնակցող 600 հյուսիսկորեացի զինվոր է զոհվել
Քաղաքականություն
30.04.2025 | 16:03
Հարավկորեացի օրենսդիրները, վկայակոչելով երկրի հետախուզական ծառայություններին, հայտարարել են, որ մոտ 600 հյուսիսկորեացի զինվոր է զոհվել Ռուսաստանի կողմից Ուկրաինայի դեմ պատերազմին մասնակցելիս՝ ընդհանուր 15,000-ից, որոնք տեղակայված են եղել Ուկրաինայի տարածքում, գրում է Reuters-ը։
Նշվում է, որ մահացած հյուսիսկորեացի զինվորների մարմինները դիակիզվել են Կուրսկի շրջանում։ Այս տարվա սկզբից ի վեր Հյուսիսային Կորեան վերադարձրել է մոտ 2000 զինվորի, որոնք, ըստ տեղեկությունների, մեկուսացված են Փհենյանում և այլուր։
Հյուսիսկորեական զորքերը Ռուսաստանում են 2024 թվականի աշնանից։ Նրանք մասնակցել են ռուսական Կուրսկի մարզում տեղի ունեցած մարտերին։
Երկար ժամանակ Ռուսաստանի Դաշնության և ԿԺԴՀ-ի իշխանությունները պաշտոնապես չէին հաստատում հյուսիսկորեական զորքերի ուղարկումը։
Ապրիլի 26-ին Ռուսաստանն առաջին անգամ հաստատել էր հյուսիսկորեացի զինվորների մասնակցությունը Ուկրաինայի դեմ պատերազմին։ Մասնավորապես, ՌԴ զինված ուժերի գլխավոր շտաբի պետ Վալերի Գերասիմովը, երկրի նախագահ Վլադիմիր Պուտինին զեկուցելով Կուրսկի մարզում տիրող իրավիճակի մասին, հայտարարել էր, որ «հյուսիսկորեացի զինծառայողները զգալի օգնություն են ցուցաբերել տարածաշրջանի ազատագրման գործում»։
Այնուհետև Հյուսիսային Կորեայի իշխանություններն էին առաջին անգամ պաշտոնապես հաստատել, որ իրենց զինվորներին ուղարկել են Ռուսաստան՝ Ուկրաինայի հետ պատերազմին մասնակցելու համար։
Թարգմանությունը՝ Էմմա Չոբանյանի
