25.05.2026 | 00:01
Մայիսի 25-ի վաղ առավոտյան ՀՀ ԶՈւ ավիացիան Երևանի կենտրոնում կատարելու է թռիչք․ ՊՆ
«Եթե խաղաղության համաձայնագիր կնքվի և Զանգեզուրի անցումը բացվի, Միջին միջանցքը կընդլայնվի՝ մեծացնելով թյուրքական աշխարհի դերը»․ Բաքվում Թուրքիայի դեսպան
Քաղաքականություն
22.04.2025 | 16:27
Բաքվում Թուրքիայի դեսպան Բիրոլ Աքգյունը բարձր է գնահատել Թուրքիա-Ադրբեջան հարաբերությունների բացառիկ վիճակը՝ ընդգծելով մշակութային, լեզվական և պատմական ընդհանրությունների վրա հիմնված եզակի կապը։ Թուրքական պետական Անադոլու գործակալության Բաքվի գրասենյակ այցելության ժամանակ Աքգյունը հայտարարել է, որ երկու երկրների նախագահներ Ռեջեփ Թայիփ Էրդողանի և Իլհամ Ալիևի ղեկավարությունը կարևոր դեր է խաղացել երկկողմ կապերի ամրապնդման գործում։
Ընդգծելով Արևելք-Արևմուտք տրանսպորտային միջանցքի աշխարհաքաղաքական նշանակությունը՝ Աքգյունն ասել է, որ դրա ամբողջ ներուժը կախված է Ադրբեջանի և Հայաստանի միջև երկարատև խաղաղության համաձայնագրի կնքումից։
«Եթե մշտական խաղաղության համաձայնագիր կնքվի և Զանգեզուրի անցումը բացվի, Չինաստանից դեպի Լոնդոն Միջին միջանցքը զգալիորեն կընդլայնվի՝ մեծացնելով թյուրքական աշխարհի դերը։ Մենք աջակցում ենք դրան»,- հայտարարել է Թուրքիայի դեսպանը։
Նա նաև շեշտել է էներգետիկ ոլորտում բարձր մակարդակի համագործակցությունը և տրանսպորտի ու կապի ոլորտում իրականացվող ենթակառուցվածքային նախագծերը։ Դեսպանն ասել է, որ այս ամռանը Բաքու-Թբիլիսի-Կարս երկաթուղու վերաբացումը կարող է զգալիորեն մեծացնել արևելք-արևմուտք բեռնափոխադրումների հոսքը, հնարավոր է՝ հնգապատկելով ներկայիս հզորությունը։
Թուրք դիվանագետն անդրադարձել է նաև Ադրբեջանի, Վրաստանի, Թուրքիայի և Բուլղարիայի միջև կնքված քառակողմ համաձայնագրին՝ դեպի Թուրքիա վերականգնվող էլեկտրաէներգիայի, ապա եվրոպական շուկաներ փոխանցելու վերաբերյալ՝ նշելով, որ այն կարող է ձգվել մինչև Ռումինիա և Մոլդովա։
Թարգմանությունը՝ Էմմա Չոբանյանի
