22.06.2026 | 01:08
ԱԱ-2026. Բելգիան ու Իրանը չպարզեցին հաղթողին. ՏԵՍԱՆՅՈՒԹ
Թեհրանը հայտնել է ԱՄՆ-Իրան հաջորդ բանակցությունների վայրի և քննարկվելիք հարցերի մասին
Քաղաքականություն
21.04.2025 | 15:16
ԱՄՆ-Իրան անուղղակի բանակցությունների հաջորդ փուլը տեղի կունենա Օմանում։ Այս մասին հայտարարել է Իրանի ԱԳՆ խոսնակ Էսմայիլ Բաղային՝ ընդգծելով, որ բանակցությունները կկենտրոնանան միջուկային հարցերի և պատժամիջոցների վերացման վրա, գրում է Mehr գործակալությունը։
«Մենք կարծում ենք, և սա փաստ է, որ բռնաճնշողական պատժամիջոցները որևէ հիմք չունեն»,- ասել է իրանցի բարձրաստիճան դիվանագետը՝ հավելելով, որ Իրանի խաղաղ միջուկային ծրագրի վերաբերյալ որևէ մտահոգություն չկա։
Բաղային նշել է, որ վերջին մի քանի տասնամյակների ընթացքում Իրանի նկատմամբ կիրառված պատժամիջոցները եղել են անհիմն, անօրինական և դաժան։ Նա հավելել է՝ Մասկատում կկայանա փորձագիտական և տեխնիկական հանդիպում, ինչպես նաև «Ուիթկոֆ և Արաղչի» բարձր մակարդակի հանդիպում։
Անդրադառնալով չորեքշաբթի փորձագետների մակարդակով կայանալիք հանդիպմանը՝ Բաղային ասել է, որ այս հանդիպումը կենտրոնացած կլինի երկու կողմերի դիրքորոշումների մանրամասների վրա։
Իրանցի պաշտոնյան ասել է նաև, որ Չինաստանն ու Ռուսաստանը ՄԱԿ-ի Անվտանգության խորհրդի երկու կարևոր անդամներ են և Իրանի կարևոր ընկերներն ու գործընկերները, և նրանք միշտ ներգրավված են քննարկումներում։
Հավելենք, որ ապրիլի 19-ին Հռոմում տեղի էր ունեցել Իրան-ԱՄՆ բանակցությունների երկրորդ փուլը։ Իսկ ահա առաջին փուլի բանակցությունները տեղի էին ունեցել ապրիլի 12-ին Օմանում։ Հանդիպումներին իրանական կողմից մասնակցել են երկրի արտաքին գործերի նախարար Աբբաս Արաղչին, ամերիկյան կողմից՝ նախագահ Դոնալդ Թրամփի հատուկ բանագնաց Սթիվ Ուիթկոֆը։
Թարգմանությունը՝ Էմմա Չոբանյանի
