Քաղաքականություն
18.04.2025 | 23:10
Թուրքիայի արտաքին գործերի նախարար Հաքան Ֆիդանը զգուշացրել է, որ թուրքական և իսրայելական ռազմական ինքնաթիռները Սիրիայում կարող են բախվել տարածաշրջանում գործողությունների ժամանակ՝ կոչ անելով ստեղծել հակամարտությունների կարգավորման փոխադարձ մեխանիզմ՝ սրացումից խուսափելու համար՝ նման Միացյալ Նահանգների և Ռուսաստանի հետ գործող արձանագրություններին, գրում է Turkiye today-ը:
«Հնարավորություն կա, որ մեր ինքնաթիռները բախվեն իսրայելական ինքնաթիռների հետ: Ինչպես հակամարտությունների լուծման մեխանիզմներ են ստեղծվել ԱՄՆ-ի և Ռուսաստանի միջև, նմանատիպ մեխանիզմ պետք է ստեղծվի նաև Իսրայելի հետ»,- ասել է Ֆիդանը։
Նա ընդգծել է, որ տեխնիկական մակարդակով շփումները գործընթացի բնականոն և անհրաժեշտ մաս են կազմում։
Սիրիայի վերաբերյալ Ֆիդանը նշել է, որ թուրքական և իսրայելական ինքնաթիռների համընկնող օդային տարածքներում գործողությունների հնարավորությունն անհրաժեշտ է դարձնում հակամարտության չեզոքացումը։ Նա հաստատել է, որ թուրքական ինքնաթիռները շարունակում են գործողությունները Սիրիայի օդային տարածքում։
Անդրադառնալով Գազայի հակամարտությանը՝ Ֆիդանը նշել է, որ Թուրքիան սերտորեն համագործակցում է արաբական պետությունների հետ և հետևում է զարգացումներին։
«Ամենամեծ խնդիրը ԱՄՆ-ի նման միջուկային զենք ունեցող երկրի՝ Իսրայելի կողքին կանգնած լինելն է։ Իսրայելի ռազմավարությունը ռմբակոծությունն է, սովը և հարկադիր միգրացիան։ Տարածաշրջանը պետք է համոզի ԱՄՆ-ին փոխել իր դիրքորոշումը»,- ասել է նա։
Ֆիդանը նաև մեկնաբանել է ԱՄՆ նախագահ Դոնալդ Թրամփի ենթադրյալ ծրագիրը Գազայի նկատմամբ վերահսկողություն սահմանելու և պաղեստինցիներին բռնի տեղահանելու վերաբերյալ՝ այն դիտարկելով տարածաշրջանում առկա խնդիրների համատեքստում։
Հիշեցնենք, որ Թուրքիան և Իսրայելը բանակցություններ են անցկացրել Ադրբեջանում։
Թարգմանությունը՝ Էմմա Չոբանյանի
