Քաղաքականություն
18.04.2025 | 15:29
Ռուսական զորքերը ապրիլի 18-ի առավոտյան հրթիռային հարված են հասցրել Ուկրաինայի Խարկով քաղաքին։ Արկը հարվածել է բազմահարկ շենքին։ Տեղական իշխանությունները հայտնում են, որ մեկ մարդ զոհվել է, 87-ը՝ վիրավորվել, գրում է Current time-ը։
Քաղաքապետ Իգոր Տերեխովը պարզաբանել է, որ հրթիռը «հարվածել է Խարկովի խիտ բնակեցված շրջանին»։
«Հարվածը տեղի է ունեցել բազմահարկ շենքում։ Հնարավոր է՝ փլատակների տակ մարդիկ լինեն»,- նշել է նա։
Իր հերթին, Խարկովի ռազմական վարչակազմի ղեկավար Օլեգ Սինեգուբովը հայտնել է, որ նախնական տեղեկություններով՝ Խարկովի վրա հրթիռային հարվածի հետևանքով հարվածներ են հասցվել Օսնովյանսկի շրջանի բնակելի շենքերին։
Հետագայում Խարկովի քաղաքապետը հայտնել է մեկ մարդու մահվան մասին, 98 մարդ վիրավորվել է։ Սինեգուբովն էլ նշել է, որ տուժածների թվում կա երկու երեխա՝ երեք և չորս տարեկան։ 13 մարդ հոսպիտալացվել է, այդ թվում՝ երկու երեխա։ Չորս մարդ ծանր վիճակում է։
«Նախնական տեղեկությունների համաձայն՝ Խարկովի վրա հարվածները հասցվել են կասետային զինամթերքով բալիստիկ հրթիռներով։ Ահա թե ինչու տուժած տարածքները շատ մեծ են»,- գրել է Տերեխովը։
Նա նշել է, որ վնասվել է ավելի քան 20 բազմաբնակարան շենք և 30 մասնավոր տուն։
Գրեթե միաժամանակ հաղորդումներ են ստացվել Դնեպր քաղաքի տարածքում տեղի ունեցած պայթյունների մասին։ Տեղի ռազմական վարչական ղեկավար Սերգեյ Լիսակը հայտնել է, որ հարվածների հետևանքով Դնեպրում ֆիթնես կենտրոն է վնասվել, հյուրանոց ու գրասենյակ։ Զոհեր ու վիրավորներ չկան։
ՌԴ ՊՆ-ն իր հերթին հայտնել է, որ գիշերը ՀՕՊ համակարգերը ոչնչացրել և որսացել են 56 ուկրաինական անօդաչու թռչող սարք։
Ռուս զինվորականների տվյալներով՝ Վորոնեժի մարզի տարածքում չեզոքացվել է 27 անօդաչու թռչող սարք, Բելգորոդի մարզի տարածքում՝ 12, Ազովի ծովի ջրերի վրա՝ 12, Ղրիմի տարածքում՝ 3, իսկ Ռոստովի մարզի և Կրասնոդարի երկրամասի տարածքներում՝ մեկական անօդաչու թռչող սարք։
Տեղում տուժածների ու վիրավորների մասին տեղեկություններ չեն հաղորդվում։
Թարգմանությունը՝ Էմմա Չոբանյանի
