Վերջին քվեարկությունը հավասարության նշան դրեց ՀՀԿ-ի, ԲՀԿ-ի և ՀՅԴ-ի միջև․ Հայկ Կոնջորյան. ՏԵՍԱՆՅՈՒԹ

«Ազգային ժողովի կանոնակարգ» սահմանադրական օրենքում փոփոխություններ կատարելու նախագծին կողմ քվեարկելու հանգամանքը հավասարության նշան դրեց Հանրապետականի, «Բարգավաճ Հայաստան», ՀՅԴ կուսակցությունների միջև: Այս մասին Factor.am-ի հետ զրույցում ասաց ԱԺ «Ելք» խմբակցության պատգամավոր Հայկ Կոնջորյանը՝ անդրադառնալով երկու օր առաջ խորհրդարանական այդ երեք ուժերի պատգամավորների կողմից ընդունված աղմկահարույց նախագծին:

«Նրանք երեքով գործում են նույն սցենարով, նրանք երեքով չեն ցանկանում, որպեսզի ժողովրդի կամքն իրապես արտացոլվի քաղաքական համակարգի ամբողջական տրամաբանության մեջ: Կարծում եմ՝ այդ հավասարությունը, որն այս երեք ուժերի միջև ևս մեկ անգամ դրվեց, դրա գնահատականը կտա հանրությունը»,- շեշտեց պատգամավորը:

Factor.am-ի հստակեցնող հարցին՝ կիսո՞ւմ է վարչապետ Նիկոլ Փաշինյանի այն գնահատականը, որ նախագծին կողմ քվեարկած ուժերը հակահեղափոխականներ են, մեր զրուցակիցն ասաց, որ այո: «Ես միանշանակ համաձայն եմ այդ գնահատականի հետ: Վարչապետը նաև նշեց, որ կան քաղաքական ուժեր, որոնք ինքնասպանությամբ են զբաղվում և ցավոք սրտի, այդ ինքնասպանությունները շարունակվում են: Ես վարչապետի այդ գնահատականի հետ ևս համաձայն եմ: Եթե չեմ սխալվում՝ Չերչիլը մի անգամ ասել է, որ քաղաքականությունը պատերազմից ավելի վատ է, որովհետև պատերազմում կարող ես մեռնել մեկ անգամ, իսկ քաղաքականության մեջ՝ մի քանի անգամ»,- շարունակեց պատգամավորը՝ նկատելով, որ հայաստանյան քաղաքականության աբսուրդն այն է, որ ոմանք կարող են մի քանի անգամ ինքնասպան լինել:

Ըստ Կոնջորյանի՝ հենց այդ մի քանի անգամ ինքնասպան լինելն ի վերջո կբերին նրան, որ ամբողջությամբ կզրոյանա այդ քաղաքական ուժերի կապիտալը: Ինչ վերաբերում է վարչապետ Նիկոլ Փաշինյանի այն հայտարարությանը, որ արտահերթ ընտրությունների անցկացման գործընթացում չեն բացառվում շուրջօրյա հանրահավաքները, պատգամավորը վստահեցրեց՝ իրենք ցանկացած դեպքում կլինեն Նիկոլ Փաշինյանի կողքին:

Հարցազրույցն ամբողջությամբ՝ տեսանյութում:

Շողիկ Գալստյան