24.06.2026 | 18:34
Երևանում ավելի քան 5 ամիս փակ կլինի Արին Բերդ փողոցի ճանապարհահատվածներից մեկը
ԱՄՆ-ն երկու ամսվա ընթացքում մտադիր է սկսել Սիրիայից զորքերի դուրսբերումը
Քաղաքականություն
16.04.2025 | 21:14
ԱՄՆ պաշտպանության ոլորտի պաշտոնյաներն իրենց իսրայելցի գործընկերներին տեղեկացրել են, որ Միացյալ Նահանգները նախատեսում է երկու ամսվա ընթացքում սկսել զորքերի փուլային դուրսբերումը Սիրիայից։ Այս մասին հայտնում է իսրայելական Ynet-ը։ Իսրայելի պաշտպանության բնագավառի պաշտոնյաները չեն հանձնվում և շարունակում են ճնշում գործադրել՝ վերանայելու որոշումը։
Լրատվամիջոցը գրում է, որ նախագահ Դոնալդ Թրամփը, որն այժմ վերադարձել է պաշտոնին, վաղուց խոստացել էր ԱՄՆ զորքերը դուրս բերել տարածաշրջանից՝ համաձայն իր վարչակազմի մեկուսացման դոկտրինի։
«Սա մեր պատերազմը չէ», – բազմիցս հայտարարել է Թրամփը։ Վաշինգտոնն այժմ անցնում է գործնական փուլ։ Կողմերի միջև քննարկումների ընթացքում Իսրայելի ներկայացուցիչները լուրջ մտահոգություններ են հայտնել հնարավոր հետևանքների վերաբերյալ:
Իսրայելցի բարձրաստիճան պաշտոնյան գնահատել է, որ դուրսբերումը կարող է լինել մասնակի, և Իսրայելը նույնպես փորձում է կանխել դա՝ վախենալով, որ դա կքաջալերի Թուրքիային, որը Ասադի ռեժիմի անկումից ի վեր բացահայտորեն ձգտում է ընդլայնել իր ազդեցությունը տարածաշրջանում։
Ներկայումս ԱՄՆ զորքերը տեղակայված են Սիրիայի արևելյան և հյուսիսային մի քանի կարևոր կետերում։ Ըստ որոշ տեղեկությունների՝ Թուրքիայի նախագահ Ռեջեփ Թայիփ Էրդողանը փորձում է օգտագործել տարածաշրջանային դինամիկայի փոփոխությունը՝ իր երկրի՝ որպես տարածաշրջանային գերիշխող տերության կարգավիճակը հաստատելու համար, որտեղ Սիրիան կենտրոնական դեր է խաղում։ Գազայի պատերազմի սկզբից ի վեր Իսրայելի նկատմամբ նրա ավելի ու ավելի թշնամական հռետորաբանությունը միայն մեծացրել է Իսրայելի մտահոգությունները։ Անցյալ շաբաթ Ադրբեջանում կայացած հանդիպման ժամանակ իսրայելցի և թուրք պաշտոնյաները քննարկել են այս հարցը։
Թարգմանությունը՝ Էմմա Չոբանյանի
