08.11.2026 | 21:21
Առատ ձյան պատճառով Գորայք-Մեղրի ճանապարհը փակ է կցորդիչով բեռնատարների համար
Թուրքիայում առգրավվել է մոտ 21.2 տոննա թմրանյութ, 200-ից ավելի մարդ է ձերբակալվել
Քաղաքականություն
15.04.2025 | 23:30
Թուրքիայի ներքին գործերի նախարար Ալի Երլիքայան հայտարարել է կազմակերպված հանցավորության դեմ հինգ երկրներում իրականացված լայնածավալ գործողության մասին, որը հանգեցրել է ավելի քան 200 մարդու ձերբակալության, հիմնականում՝ Թուրքիայում, գրում է Turkish Minute-ը։
«Այսօր առավոտյան ձերբակալվել է կազմակերպված հանցավոր խմբի 234 բարձրաստիճան անդամ, որոնցից 9-ը գտնվում էին արտասահմանում, իսկ 225-ը՝ հայրենիքում», – մամուլի ասուլիսում ասել է Ալի Երլիքայան։ Նա նշել է, որ միաժամանակյա խուզարկություններ են իրականացվել Նիդերլանդներում, Գերմանիայում, Իսպանիայում, Բելգիայում և Թուրքիայում։
Գործողության նախապատրաստման ընթացքում պաշտոնյաները փաստաթղթեր և հետախուզական տվյալներ են փոխանակել մի շարք երկրների, այդ թվում՝ Ֆրանսիայի և Մեծ Բրիտանիայի հետ։ Նախարարը նշել է, որ առգրավվել է մոտ 21.2 տոննա թմրանյութ։
«Այս հանցավոր կազմակերպությունները փորձել են Հարավային Ամերիկայի երկրներից ծովով և ցամաքով մեր երկիր և Եվրոպա տեղափոխել կոկաին, Իրանից և Աֆղանստանից՝ հերոին, Բալկաններով՝ մարիխուանա և Եվրոպայով՝ էքստազի», – հայտարարել է Երլիքայան։
Թարգմանությունը՝ Էմմա Չոբանյանի
