05.07.2026 | 01:14
«Ուիմբլդոն». Կարեն Խաչանովը դուրս է մնացել պայքարից
Չմասնակցե՛լ մայիսի 9-ին Մոսկվայում կայանալիք ռազմական շքերթին․ ԵՄ զգուշացումը՝ թեկնածու երկրներին
Քաղաքականություն
15.04.2025 | 10:45
ԵՄ թեկնածու երկրներին հասկացվել է, որ նրանք չպետք է մասնակցեն մայիսի 9-ին Մոսկվայում կայանալիք ռազմական շքերթին։ Այս մասին հայտարարել է Լատվիայի արտաքին գործերի նախարար Բաիբա Բրաժեն նախօրիեն Լյուքսեմբուրգում ԵՄ արտաքին գործերի նախարարների հանդիպման մեկնարկից առաջ, փոխանցում է DW-ի ռուսական ծառայությունը։
«Երեկ մենք ունեցանք հագեցած երեկո, ընթրիք Արևմտյան Բալկանների գործընկերների հետ։ Շատ քննարկումներ արժեքների, ընդհանուր արտաքին և անվտանգության քաղաքականության համակարգման, ներառյալ՝ պատժամիջոցների վերաբերյալ։ Այդ թվում՝ ԵՄ անդամ պետությունների կողմից թեկնածուներին տրված շատ հստակ հրահանգ՝ չմասնակցել մայիսի 9-ի շքերթին Մոսկվայում, չկատարել նման ուղևորություններ, քանի որ դա չի համապատասխանի ԵՄ արժեքներին»,-նշել է Բրաժեն։ Սա մամուլի ասուլիսում հաստատել է նաև ԵՄ արտաքին գործերի և անվտանգության քաղաքականության հարցերով բարձր ներկայացուցիչ Կայա Կալասը։
«Մենք թեկնածուներին հստակ հասկացրել ենք, որ նրանք չպետք է մասնակցեն մայիսի 9-ին Մոսկվայում կայանալիք շքերթին», – ասել է Կալասը։
Լեհաստանի արտաքին գործերի նախարար Ռադոսլավ Սիկորսկին էլ, իր հերթին, հայտարարել, որ Ուկրաինայի արտաքին գործերի նախարար Անդրեյ Սիբիհան, իր և Կայա Կալլասի հետ համաձայնությամբ, նախարարներին հրավիրում է Լվովում մայիսի 9-ին կայանալիք հանդիպմանը։
«Կարծում եմ, որ դա հիանալի գաղափար է ցույց տալ, որ Եվրոպան մոտ է Ուկրաինայում, և ոչ թե Պուտինի կողմից Մոսկվայում։ Ես նաև համաձայն եմ Կայա Կալասի հետ, որ անդամ պետության կամ թեկնածու երկրի ցանկացած ներկայացուցչի ներկայությունը Մոսկվայում ամոթ կլինի այդ պետության համար», – հայտարարել է նա։
Հավելենք, որ Հայաստանը թեև ԵՄ թեկնածու չէ, սակայն ՀՀ ԱԺ-ն ավելի վաղ ընդունել էր «Եվրոպական միությանը Հայաստանի Հանրապետության անդամակցելու գործընթացի մեկնարկի մասին» օրենքի նախագիծը։
Դեռևս մարտի 14-ին ՀՀ վարչապետ Նիկոլ Փաշինյանի ու ՌԴ նախագահ Վլադիմիր Պուտինի միջև կայացած հեռախոսազրույցից հետո Կրեմլը հայտնել էր, որ Հայաստանի վարչապետը հաստատել է, որ ընդունում է Ռուսաստանի նախագահի հրավերն ու մասնակցելու է մայիսի 9-ին Մոսկվայում նախանշված Հայրենական մեծ պատերազմում տարած հաղթանակի 80-ամյակի հոբելյանական տոնակատարություններին։
Սակայն հայկական կողմը մինչ օր պաշտոնապես չի հաստատել Փաշինյանի մասնակցությունը Մոսկվայում կայանալիք միջոցառումներին։ Օրերս ՀՀ վարչապետի մամուլի խոսակ Նազելի Բաղդասարյանը հայտարարել էր, որ մայիսի 9-ին ՌԴ-ում Փաշինյան-Պուտին-Ալիև եռակողմ ձևաչափով հանդիպում նախատեսված չէ, առանց հստակեցնելու՝ արդյոք, առհասարակ, Փաշինյանի Մոսկվա այց նախատեսված է, թե՝ ոչ։
Էմմա Չոբանյան
