ՌԴ ՊՆ-ն հաստատել է ուկրաինական Սումի քաղաքի հրթիռակոծումը

Ռուսաստանի Պաշտպանության նախարարությունը հաստատել է, որ ապրիլի 13-ին  երկրի զինված ուժերը Սումի քաղաքի ուղղությամբ երկու «Իսկանդեր-Մ» հրթիռ են արձակել, գրում է Meduza-ն։

Ըստ ռուսական ռազմական գերատեսչության՝ հարվածի թիրախը եղել է Ուկրաինայի զինված ուժերի «Սևերսկի» օպերատիվ-մարտավարական խմբի հրամանատարական շտաբի հանդիպման վայրը։ Ռուսաստանի ՊՆ-ն հայտարարել է, որ հարվածի հետևանքով զոհվել է ավելի քան 60 ուկրաինացի զինծառայող։

«Կիևի ռեժիմը շարունակում է օգտագործել ուկրաինական բնակչությանը որպես կենդանի վահան՝ խիտ բնակեցված քաղաքի կենտրոնում տեղադրելով ռազմական օբյեկտներ և անցկացնելով զինվորական անձնակազմի մասնակցությամբ միջոցառումներ»,- ասվում է հայտարարության մեջ։

Այսօր ավելի վաղ էլ ճեպազրույցում ՌԴ նախագահի խոսնակ Դմիտրի Պեսկովը հայտարարել էր, որ չի մեկնաբանի ապրիլի 13-ին Սումի քաղաքի վրա Ռուսաստանի զինված ուժերի հարվածը։ Նա առաջարկել էր հիմնվել Ռուսաստանի պաշտպանության նախարարության տեղեկատվության վրա։

«Ես կարող եմ միայն կրկնել և հիշեցնել ձեզ մեր նախագահի ու ռազմական ներկայացուցիչների բազմիցս արված հայտարարությունները, որ մեր զինված ուժերը հարվածում են բացառապես ռազմական և մոտակա ռազմական թիրախներին»,- ասել էր նա։

Հավելենք, որ ապրիլի 13-ին Սումիի վրա ռուսական հարվածի հետևանքով զոհվել է 34 մարդ, այդ թվում՝ երկու երեխա։ Վիրավորվել է առնվազն 119 մարդ, այդ թվում՝ 15 երեխա։

Թարգմանությունը՝ Էմմա Չոբանյանի