ԱՄՆ-ը և ՌԴ-ն մանրամասներ են հայտնել Ստամբուլում տեղի ունեցած բանակցություններից

ԱՄՆ Պետքարտուղարությունը մանրամասներ է հայտնել ապրիլի 10-ին Ստամբուլում անցկացված ռուս-ամերիկյան բանակցություններից։

Մասնավորապես, ամերիկյան կողմի հաղորդագրության մեջ նշվում է, որ  ԱՄՆ պետքարտուղարի Ռուսաստանի և Կենտրոնական Եվրոպայի հարցերով օգնականի տեղակալ Սոնատա Քոուլթերի գլխավորած պատվիրակությունն ապրիլի 10-ին Ստամբուլում հանդիպել է ՌԴ դեսպան Ալեքսանդր Դարչիևի գլխավորած պատվիրակության հետ։ Այս հանդիպումը խորհրդակցությունների երկրորդ փուլն է։ Առաջինը տեղի էր ունեցել փետրվարի 27-ին դարձյալ Ստամբուլում։

«Շարունակելով փետրվարի 27-ի հանդիպման ժամանակ ձևավորված կառուցողական մոտեցումը՝ ԱՄՆ-ի և Ռուսաստանի պատվիրակությունները նոտաներ փոխանակեցին՝ Ռուսաստանի և ԱՄՆ-ի երկկողմ դիվանագիտական առաքելությունների գործունեության կայունությունն ապահովելու վերաբերյալ փոխըմբռնումն ավարտելու համար։ Միացյալ Նահանգները վերահաստատել է իր մտահոգությունը Ռուսաստանի Դաշնության կողմից տեղական անձնակազմի աշխատանքի ընդունումն արգելող քաղաքականության վերաբերյալ, որը Մոսկվայում ԱՄՆ դեսպանատանը կայուն անձնակազմի մակարդակի պահպանման հիմնական խոչընդոտն է»,- ասվում է հայտարարության մեջ։

Նշվում է, որ կողմերը քննարկել են, անհրաժեշտության դեպքում, այս հարցերի վերաբերյալ առաջիկայում հետագա հանդիպում անցկացնելու հնարավորությունը, ամսաթիվը և վայրը կորոշվեն ավելի ուշ։

ՌԴ ԱԳՆ-ն իր հերթին հայտնում է, որ պատվիրակությունները նոտաներ են փոխանակել՝ հաստատելով ռուսական և ամերիկյան դիվանագիտական ​​առաքելությունների համար անխափան բանկային և ֆինանսական ծառայությունների ապահովման, ինչպես նաև ՄԱԿ-ի և այլ միջազգային կազմակերպությունների բյուջեներին Ռուսաստանի Դաշնության կողմից վճարումների կատարման հետ կապված փոխադարձ պարտավորությունների վերաբերյալ ձեռք բերված համաձայնությունը։

«Ռուսական կողմի բարձրացված՝ ԱՄՆ իշխանությունների կողմից բռնագրավված և Ռուսաստանի Դաշնությանը պատկանող վեց դիվանագիտական ​​սեփականության վերադարձման վերաբերյալ հարցի համատեքստում համաձայնություն է ձեռք բերվել մշակել «ճանապարհային քարտեզ»։ Դեսպան Դարչիևը հատկապես ընդգծել է այս ուղղությամբ անհապաղ գործնական քայլերի կարևորությունը, այդ թվում՝ Ռուսաստանի ներկայացուցիչների անհապաղ մուտքը նշված օբյեկտներ՝ պատճառված վնասի ստուգման և գնահատման համար»,- ասվում է հայտարարության մեջ։

ՌԴ ԱԳՆ-ն ընդգծում է, որ շարունակվել են աշխատանքները հյուրընկալող երկրի դիվանագիտական ​​առաքելությունների աշխատակիցների համար վիզաների մշակման և ճանապարհորդության կազմակերպման հեշտացման ուղղությամբ։ ՌԴ դեսպանը կոչ է արել ավելի եռանդուն առաջ շարժվել խոշոր խնդիրների լուծման ուղղությամբ, որոնք կնպաստեն փոխադարձ վստահության ամրապնդմանը և գործարար ու հասարակական կապերի ընդլայնմանը, ինչպիսին է ուղիղ օդային հաղորդակցության վերականգնումը։

Ըստ ռուսական կողմի՝ խորհրդակցությունների արդյունքներով որոշում է կայացվել օպերատիվ կերպով մշակել ներկայացված առաջարկները։ Նպատակն է փոխադարձաբար ընդունելի լուծումների հասնել մինչև խորհրդակցությունների նոր փուլը, որի ժամկետները համաձայնեցվում են։

Թարգմանությունը՝ Էմմա Չոբանյանի