ՀՀ վարչապետ Նիկոլ Փաշինյանը ֆեյսբուքի իր էջում գրառում է կատարել՝ դիմելով հանրապետական պատգամավոր Արմեն Աշոտյանին:
«Երեկ ԱԺ-ում Արմեն Աշոտյանի հրապարակած տեղեկությունները, թե հոկտեմբերի 2-ի երեկոյան հանրահավաքի ընթացքում ապակիներ են ջարդվել, մեքենաներ են վնասվել, միջադեպեր են եղել, չեն հաստատվում:
Առաջարկում եմ, որ պարոն Աշոտյանը հատ-հատ հրապարակի դեպքերը, որպեսզի ոստիկանությունը դրանք հետաքննելու հնարավորություն ունենա»,- գրել է նա:
Հիշեցնենք, որ երեկ Ազգային ժողովի «Ելք» խմբակցության ղեկավար Լենա Նազարյանը վարչապետ Նիկոլ Փաշինյանից հետաքրքրվել էր՝ արդյոք վերջինս տեղյակ է, որ ԱԺ ՀՀԿ-ական պատգամավոր Միհրան Պողոսյանը նախօրեին հանրահավաքից հեռացող քաղաքացիներին հայհոյել է, և եթե տեղյակ է՝ ի՞նչ քայլեր են ձեռնարկվելու այդ ուղղությամբ։
Վարչապետն ի պատասխան նկատել էր, որ կատարվածը փաստում է, որ ասֆալտներին պառկեցնելու հրահանգը պատշաճ չի կատարվել, ինչը, եթե պատշաճ ձևով կատարված լիներ, երեկվա միջադեպը տեղի չէր ունենար։ Վարչապետն ապա զգուշացրել էր, որ իրավապահները միջոցներ ձեռք առնեն, որպեսզի չստացվի այնպես, որ Միհրան Պողոսյանն ու նրա նմանները Երևանում քայլելու պրոբլեմ ունենան։
Վարչապետի ելույթին արձագանքել էր ՀՀԿ-ական պատգամավոր Արմեն Աշոտյանը՝ նշելով, որ հանրահավաքից հետո ապակիներ են ջարդվել, մեքենաներ են վնասվել ու բռնություն է գործադրվել նաև ՀՅԴ խմբակցության պատգամավոր Ռուզան Առաքելյանի նկատմամբ ու հանուն արդարության հարկ է նաև այդ միջադեպերին անդրադառնալ:
Երեկ երեկոյան ոստիկանության Արաբկիրի բաժնում նյութեր են նախապատրաստվել ու բաժնի պետի հետաքննության գծով տեղակալը հեռախոսազրույց է ունեցել պատգամավոր Ռուզան Առաքելյանի հետ։ Վերջինս ոստիկանության ծառայողին հայտնել է, որ իր նկատմամբ բռնություն չի գործադրվել․ ընդամենը վեճ է տեղի ունեցել հավաքված կանանցից մեկի հետ։ Ինքն այդ մասին տեղեկացրել է նաև ԱԺ պատգամավոր Արմեն Աշոտյանին։ Շնորհակալություն է հայտնել ոստիկանությանը մտահոգության համար և խնդրել, որ այդ կապակցությամբ իրեն չայցելեն, ոչ էլ հրավիրեն ոստիկանություն։
