Մերցը շաբաթներ տևած բանակցություններից հետո հայտարարել է Գերմանիայում իշխող կոալիցիայի ձևավորման մասին

Գերմանացի պահպանողականները Ֆրիդրիխ Մերցի գլխավորությամբ չորեքշաբթի համաձայնության են եկել ձախ կենտրոնամետ սոցիալ-դեմոկրատների (SPD) հետ կոալիցիոն համաձայնագրի շուրջ, գրում է France 24-ը։

Մերցը, որի CDU/CSU դաշինքը հաղթել է փետրվարի ընտրություններում, հուսով է արագ ստանձնել Եվրոպայի առաջատար տնտեսությունը, քանի որ ԵՄ-ն բախվում է անդրատլանտյան անվտանգության կապերի լայնածավալ փոփոխությունների և ԱՄՆ նախագահ Դոնալդ Թրամփի կողմից սկսված առևտրային պատերազմին: Նա ցանկանում է նոր դաշինք ստեղծել հեռացող կանցլեր Օլաֆ Շոլցի Սոցիալ-դեմոկրատների (SPD) հետ, որպեսզի կարողանա նոր կառավարություն ձևավորել մինչև մայիսի սկիզբը։

Կոալիցիոն բանակցությունները հատկապես հրատապ էին դարձել, քանի որ ծայրահեղ աջ «Այլընտրանք Գերմանիայի համար» (AfD) կուսակցության աջակցությունը շարունակում է աճել, ընդ որում, սոցհարցումները ցույց են տալիս, որ այն հավասար է CDU/CSU-ին կամ նույնիսկ մի փոքր առաջ:

Սպասվում է, որ Ֆրիդրիխ Մերցը Գերմանիայի կանցլերի պաշտոնում կընտրվի մայիսի 7-ին։

Գերմանիայում փետրվարի 6-ին Շոլցի եռակողմ կոալիցիայի փլուզումից հետո անցկացվել էին համընդհանուր ընտրություններ։

Ընտրություններում հաղթել էր Քրիստոնեա-դեմոկրատական և Քրիստոնեա-սոցիալական միության դաշինքը։ Սոցիալ-դեմոկրատները զբաղեցրել էին երրորդ տեղը։

AfD-ն հավաքել էր ձայների ռեկորդային արդյունք՝ ավելի քան 20 տոկոս՝ դառնալով երկրորդ ամենամեծ կուսակցությունը:

Թարգմանությունը՝ Էմմա Չոբանյանի