25.04.2026 | 10:06
ՀՀ տարածքում ավտոճանապարհները հիմնականում անցանելի են
Օրվա ուշագրավ լուրերը՝ մեկ տեսաշարով. ՏԵՍԱՆՅՈՒԹ
Քաղաքականություն
03.10.2018 | 20:00
Աշխատանքային այցով Միացյալ Նահանգներում գտնվող նախագահ Արմեն Սարգսյանը հեռախոսազրույցներ է ունեցել վարչապետի և Ազգային ժողովի նախագահի հետ: Առիթը նախօրեին խորհրդարանի կողմից ընդունված վիճահարույց օրինագծից հետո երկրում ստեղծված իրավիճակն է: Օրինագծին նախագահը կանդրադառնա Երևան վերադառնալուց անմիջապես հետո, իսկ մինչ այդ հորդորում է միմյանց հանդեպ զուսպ և հանդուրժողական լինել: Նա համոզված է, որ ստեղծված իրավիճակը հնարավոր է և պետք է հանգուցալուծել Սահմանադրության և օրենքների շրջանակում՝ բանակցության և երկխոսության ճանապարհով:
Նախօրեի իրադարձություններից հետո ազգային համաձայնության կառավարությունը փլուզվեց: Խորհրդարանում կայացած քվեարկությունից կարճ ժամանակ անց ՀՅԴ-ն հայտարարեց կոալիցիայից դուրս գալու մասին, րոպեներ անց էլ վարչապետ Նիկոլ Փաշինյանը Բաղրամյան պողոտայում հրավիրած հանրահավաքի ժամանակ հայտարարեց, որ աշխատանքից ազատում է կառավարության մաս կազմող ՀՅԴ-ական և ԲՀԿ-ական նախարարներին ու մարզպետներին և հենց Բաղրամյան պողոտայում ստորագրեց որոշումները: Այսօր առավոտյան արդեն նախագահ Արմեն Սարգսյանը ստորագրեց համապատասխան հրամանագրերը: Ազգային համաձայնության կառավարությունում, հիշեցնենք, ԲՀԿ-ն ուներ 4, ՀՅԴ-ն՝ 2 նախարարական պորտֆել: Հրաժարական են ներկայացրել նաև այս կուսակցություններից մարզպետները: Բացի այդ՝ հրաժարականի դիմում է ներկայացրել բնապահպանության նախարարության անտառային պետական կոմիտեի նախագահ, Երևանի քաղաքապետի թեկնածու առաջադրված Միքայել Մանուկյանը:
Ազգային ժողովի քառօրյայի այսօրվա նիստում առավոտից ոչ մի կերպ չէր հաջողվում քվորում ապահովել: Որոշ ժամանակ անց քվորումի համար անհրաժեշտ 53 պատգամավորներ գրանցվեցին, բայց այս անգամ էլ նույնքան պատգամավոր չկար դահլիճում՝ քվեարկություններ կազմակերպելու համար: Ի վերջո, խորհրդարանին հաջողվեց քվեարկել և ընդունել նախորդ օրը քննարկված օրինագծերը: Երեկոյան արդեն Ազգային ժողովում էին կառավարության անդամները՝ ավանդական հարցուպատասխանի:
«Սասնա ծռեր» խմբի անդամներ Պավլիկ Մանուկյանն ու Արմեն Բիլյանը հացադուլ են հայտարարել: Նրանք պահանջում են փոխել իրենց խափանման միջոց կալանավորումը: Մանուկյանը չի բացառել, որ հաջորդ նիստին դատարան չի ներկայանա, նաև դատախազներից պահանջել իրենց այսուհետ «ամբաստանյալ» չասել: Հավելենք, որ «Սասնա ծռեր» խմբից դեռևս կալանքի տակ են միայն գործով անցնող երեք ամբաստանյալ՝ Պավլիկ Մանուկյանը, Արմեն Բիլյանն ու Սմբատ Բարսեղյանը: Մյուսներն Ազգային ժողովի պատգամավորների անձնական երաշխավորությամբ ազատ են արձակվել:
Հինգշաբթի վարչապետ Նիկոլ Փաշինյանը Ֆրանսիա կմեկնի՝ մասնակցելու Շառլ Ազնավուրի հոգեհանգստին և հուղարկավորությանը: Արարողություններին մասնակցելու համար ԱՄՆ-ից Փարիզ կմեկնի նաև Հանրապետության նախագահը: Աշխարհահռչակ շանսոնյեի հուղարկավորության օրը Հայաստանում և Արցախում սգո օր կհայտարարվի: Նշենք, որ Ազնավուրը ցանկություն է հայտնել հուղարկավորվել ծնողների կողքին:
Ազգային ժողովի այգու դարպասները բացվեցին քաղաքացիների առջև: Հրահանգը վարչապետից է ստացվել: Նիկոլ Փաշինյանի կարգադրությամբ սեպտեմբերի 21-ին էլ բացվել էին Բաղրամյան 26-ի դարպասները: Քաղաքացիները գոհ են վարչապետի որոշումից:
