22.04.2026 | 23:30
ՀՀ տարածքում ավտոճանապարհները հիմնականում անցանելի են
«Վարորդը քնել է ղեկին, բժիշկն ամրակապված չի եղել»․ վարկածներ՝ շտապօգնության մեքենայի վթարից. ՏԵՍԱՆՅՈՒԹ
Հասարակություն
08.04.2025 | 20:45
Շտապօգնության մեքենայի ողբերգական պատահարը տեղի է ունեցել մետրոյի «Գործարանային» կայարանի հարևանությամբ՝ Թամանցիների փողոցում։ Բժշկի կյանքը փրկել չի հաջողվել, բուժքրոջ վիճակը կայուն ծանր է։ Շտապօգնության տնօրեն Ռուբեն Գրիգորյանը առավոտյան Factor TV-ի հետ զրույցում կարծիք հայտնեց, որ վարորդն, ամենայն հավանականությամբ, ղեկին քնել է։
Դեպքից հետո Երևանի քաղաքապետի մամուլի քարտուղար Հայկ Կոստանյանը ֆեյսբուքյան գրառմամբ տեղեկացրեց, որ բժիշկն ամրակապված չի եղել և ծանր վնասվածքներ ստանալու հավանական պատճառներից մեկը դա է։ Թեմային անդրադարձավ նաև ԱԺ պատգամավոր, առողջապահաության նախարարության նախկին նախարար Արսեն Թորոսյանը։
Չնայած ամրակապվելու հորդորներին՝ Ճանապարհային երթևեկության անվտանգության ապահովման մասին օրենքի 24-րդ հոդվածը թույլատրվում է բնակավայրերում օպերատիվ ծառայությունների, թափքի գունագրաֆիկ երանգավորում ունեցող ավտոմոբիլների վարորդներին և ուղևորներին գոտիներով չամրակապվել։
Վարորդի ընկեր ՀԿ ղեկավար Տիգրան Քեյանի խոսքով՝ որքան էլ կարևոր է շտապօգնության արագ արձագանքը, նման բացառությունը մտահոգիչ է։ Անդրադառնալով վարորդի՝ ղեկին քնելու վարկածին՝ Քեյանը նկատում է՝ վարորդները հաճախ աշխատում են սահմանված 8 ժամյա աշխատանքային գրաֆիկից ավելի, ինչը բերում է սթրեսային իրավիճակների ու կարող է վտանգավոր լինել:
Շտապօգնության մեքենայի՝ էլեկտրասյանը բախվելու դեպքի առնչությամբ Քննչական կոմիտեում վարույթ է նախաձեռնվել։ Քննչական կոմիտեից Factor TV-ին հայտնեցին, որ վարույթը նախաձեռնվել է ճանապարհային երթևեկության անվտանգությունն ապահովող կանոնները խախտելու հատկանիշներով։ կատարվում է նախաքննությունը։ Նշանակվել է դիակի դատաբժշկական փորձաքննություն:
Մանրամասները՝ տեսանյութում։
Անի Թամրազյան
