Քաղաքականություն
01.04.2025 | 16:38
Ադրբեջանի նախագահ Իլհամ Ալիևն ընդունել է Բաքվում գտնվող Իրանի նախագահի արտաքին քաղաքականության հարցերով խորհրդական Մեհդի Սանային։ Ադրբեջանական կողմի հաղորդմամբ՝ վերջինն ընդգծել է, որ Իրանը մեծ նշանակություն է տալիս հարևան պետությունների, հատկապես՝ Ադրբեջանի հետ հարաբերությունների զարգացմանը, որի հետ ունի պատմական, կրոնական և մշակութային կապեր, նաև գոհունակություն է հայտնել բոլոր ոլորտներում երկու երկրների միջև հարաբերությունների ներկայիս զարգացումից։
Ալիևն իր հերթին նշել է, որ Ադրբեջանն ու Իրանը կիսում են ընդհանուր արժեքներ, դրական է գնահատել վերջին երկկողմ այցերի դինամիկան։
Հանդիպմանը քննարկվել են տրանսպորտի ոլորտում երկու երկրների համագործակցության հարցեր, հատկապես՝ Հյուսիս-Հարավ տրանսպորտային միջանցքի զարգացումը, անդրադարձ է եղել միջկառավարական հանձնաժողովի գործունեությանը։
Զրույցի ընթացքում մտքերի փոխանակություն է տեղի ունեցել Արաքս գետի վրա Աղբենդի ուղղությամբ կամրջի կառուցման ընթացքի շուրջ։
Ըստ ադրբեջանական լրատվամիջոցների՝ Ադրբեջան այցի ընթացքում նախատեսվում են Իրանի նախագահի խորհրդականի հանդիպումները նաև Ալիևի օգնական Հիքմեթ Հաջիևի, ԱԳ նախարար Ջեյհուն Բայրամովի և պաշտոնյաների հետ։
Թարգմանությունը՝ Էմմա Չոբանյանի
