09.08.2026 | 13:13
Դաշտավանում ծեծկռտուք է եղել․ մասնակիցները հարվածել են քարերով, մահակներով և կռփազենքով
ԱՄՆ-ում թուրք ուսանողուհու ձերբակալման ֆոնին՝ Ռուբիոն հայտարարել է, որ չեղարկվել են հակաիսրայելական ցույցերի մասնակից ավելի քան 300 ուսանողների վիզաները
Քաղաքականություն
28.03.2025 | 21:27
ԱՄՆ-ը չեղարկել է ավելի քան 300 օտարերկրյա ուսանողների վիզաները, որոնք մասնակցել են հակաիսրայելական ցույցերին՝ ԱՄՆ արտաքին քաղաքականությանը դեմ շարժմանն աջակցելու համար։ Այս մասին հայտարարել է ԱՄՆ պետքարտուղար Մարկո Ռուբիոն, գրում է Current time-ը։
«Մենք դա անում ենք ամեն օր: Ամեն անգամ, երբ ես գտնում եմ այդ խելագարներից մեկին, ես չեղարկում եմ նրա վիզան։ Մենք քեզ վիզա ենք տվել՝ այստեղ սովորելու, դիպլոմ ստանալու համար, այլ ոչ թե հանրային ակտիվիստ դառնալու։ Եթե մենք վիզա ենք տվել, իսկ դու որոշում ես դրանով զբաղվել, ապա մենք այն պարզապես վերցնում ենք»,- ասել է Ռուբիոն Գայանա կատարած այցի ժամանակ։
Ռուբիոն այս հայտարարությունն արել է՝ ի պատասխան Թաֆթսի համալսարանում սովորող թուրք ուսանողուհի Ռումեյսա Օզթյուրքի արտաքսման և վիզաների չեղարկման պատճառների մասին հարցին։ Պետքարտուղարը չի նշել, թե կոնկրետ ինչում է մեղադրվում Օզթյուրքը՝ ասելով միայն, որ իրեն տրամադրված տեղեկությունների համաձայն՝ նա համապատասխանում է վիզայի չեղարկման չափանիշներին։
Օզթյուրքը մասնակցել է պաղեստինամետ բողոքի ցույցերին և կոչ է արել իր համալսարանին խզել հարաբերությունները Իսրայելի հետ կապված ընկերությունների հետ և ճանաչել «պաղեստինյան ցեղասպանությունը»: Նա ձերբակալված է, սակայն դեռևս չի արտաքսվել ԱՄՆ-ից։
Հավելենք, որ ուսանողուհու ձերբակալության կադրերն ակտիվորեն տարածվում են համացանցում։ Միջադեպը դատապարտել են թուրքական քաղաքական դաշտի տարբեր դերակատարներ։
Թուրքիայի իշխող «Արդարություն և զարգացում» կուսակցության (ԱԶԿ) խոսնակ Օմեր Չելիքը պաշտպանել է Օզթյուրքին։
«Ռումեյսա Օզթյուրքի ենթադրյալ հանցանքը Պաղեստինում իսրայելական ցեղասպանության դեմ հանդես գալն է: Մենք ուշադիր հետևում ենք այս խնդրին: Միջազգային լրատվամիջոցների միջոցով մանիպուլյացիա է հայտնվում: Սա նույնականացում է, որը սիոնիստներն օգտագործում են սեփական հանցագործությունները թաքցնելու համար։ Մենք բազմիցս հայտարարել ենք՝ դեմ ենք և՛ հակասեմականությանը, և՛ իսլամատյացությանը: Ցեղասպանության այս գործողություններին հակադրվելը հավասարազոր է մարդկային արժեքների պաշտպանությանը»,- ասել է Չելիքը:
Թուրքիայի ընդդիմադիր Ժողովրդահանրապետական կուսակցության առաջնորդ Օզգյուր Օզելը նույնպես խստորեն քննադատել է ուսանողուհու ձերբակալումը։
Թարգմանությունը՝ Էմմա Չոբանյանի
