14.09.2026 | 23:23
Պապիկյանի գլխավորած պատվիրակությունն աշխատանքային այցով մեկնել է Չինաստան
Վարչապետի աշխատակազմից համառորեն չեն հայտնում՝ արդյո՞ք Նիկոլ Փաշինյանն ընդունել է մայիսի 9-ին Մոսկվա մեկնելու հրավերը
Քաղաքականություն
27.03.2025 | 14:52
Ռուսաստանի Դաշնությունից այսօր հերթական անգամ հայտարարել են, որ ՀՀ վարչապետ Նիկոլ Փաշինյանն ընդունել է մայիսի 9-ին Մոսկվա այցելելու հրավերը։ ՌԴ ԱԳՆ պաշտոնական ներկայացուցիչ Մարիա Զախարովան ամենշաբաթյա ճեպազրույցի ժամանակ հայտարարել է, որ ՀՀ վարչապետ Նիկոլ Փաշինյանն ընդունել է Մոսկվա այցելելու հրավերը՝ մասնակցելու հաղթանակի 80-ամյակին նվիրված հանդիսավոր միջոցառումներին։
Factor.am-ը կապ հաստատեց վարչապետի աշխատակազմի տեղեկատվության և հասարակայնության հետ կապերի բաժնի պետ Արմեն Խաչատրյանի հետ՝ ճշտելու՝ արդյո՞ք Փաշինյանն ընդունել է պաշտոնական Մոսկվայի հրավերը։
Խաչատրյանը պատասխանեց, որ Փաշինյանի բոլոր այցերի վերաբերյալ աշխատակազմը ժամանակին տրամադրում է պատշաճ տեղեկություն։ Հստակեցնող հարցին՝ հնարավո՞ր է՝ Հայաստանը դեռևս հստակ չի պատասխանել Մոսկվային հրավերի հետ կապված, Արմեն Խաչատրյանը նշեց, որ ավելացնելու ոչինչ չունի։
Հիշեցնենք, որ ավելի վաղ Factor.am-ը գրավոր հարցում էր ուղարկել վարչապետի աշխատակազմին, սակայն այդպես էլ չէին հայտել՝ արդյո՞ք Նիկոլ Փաշինյանը մեկնելու է Մոսկվա՝ մասնակցելու մայիսի 9-ի միջոցառումներին։
Մարտի 14-ին Փաշինյան-Պուտին հեռախոսազրույցից հետո Կրեմլի տարածած հաղորդագրության մեջ ասվում էր, որ Հայաստանի վարչապետը հաստատել և ընդունել է ՌԴ նախագահի հրավերը՝ մասնակցելու մայիսի 9-ին Մոսկվայում նախատեսված Հայրենական մեծ պատերազմում տարած հաղթանակի 80-ամյակի հոբելյանական տոնակատարություններին։
Հիշեցնենք, որ նախորդ տարի Նիկոլ Փաշինյանը չէր մեկնել Մոսկվա և չէր մասնակցել Հաղթանակի շքերթին։ ՀՀ վարչապետը Մոսկվայում Հաղթանակի տոնակատարություններին մասնակցել էր 2023 թվականի մայիսի 9-ին։
Մանյա Պողոսյան
