06.10.2026 | 12:01
Հաքերները Դանիայում հասանելիություն են ստացել 8,8 միլիոն մարդու տվյալներին
Վարչապետի աշխատակազմից չեն հայտնում՝ արդյոք Փաշինյանը Մոսկվայում մասնակցելու է մայիսի 9-ի միջոցառումներին
Քաղաքականություն
21.03.2025 | 11:30
ՀՀ վարչապետի աշխատակազմից չեն հայտնում՝ արդյոք Նիկոլ Փաշինյանը մեկնելու է Մոսկվա՝ մասնակցելու մայիսի 9-ի միջոցառումներին։ Factor.am-ի գրավոր հարցմանն ի պատասխան վարչապետի աշխատակազմից միայն նշել են, որ Նիկոլ Փաշինյանի բոլոր այցերի վերաբերյալ աշխատակազմը ժամանակին տրամադրում է պատշաճ տեղեկություն։
Մարտի 14-ին Փաշինյան-Պուտին հեռախոսազրույցից հետո Կրեմի տարածած հաղորդագրության մեջ ասվում էր, որ Հայաստանի վարչապետը հաստատել և ընդունել է ՌԴ նախագահի հրավերը՝ մասնակցելու մայիսի 9-ին Մոսկվայում նախատեսված Հայրենական մեծ պատերազմում տարած հաղթանակի 80-ամյակի հոբելյանական տոնակատարություններին։
Երեկ էլ ՌԴ ԱԳՆ պաշտոնական ներկայացուցիչ Մարիա Զախարովան ճեպազրույցի ժամանակ ասել էր, թե Մոսկվան ակնկալում է, որ Նիկոլ Փաշինյանն ու Իլհամ Ալիևը կմասնակցեն մայիսի 9-ին կայանալիք միջոցառումներին։
«Մենք միայն ողջունում ենք, սպասում ենք և՛ Ադրբեջանի, և՛ Հայաստանի ղեկավարներին։ Մենք միայն ուրախ ենք տեսնել այն երկրների ղեկավարներին, որոնք հրավերներ են ստացել և հաստատել իրենց մասնակցությունը»,- ասել էր Զախարովան:
Հիշեցնենք, որ նախորդ տարի Նիկոլ Փաշինյանը չէր մեկնել Մոսկվա և չէր մասնակցել Հաղթանակի շքերթին։ Հայաստանի վարչապետը Մոսկվայում Հաղթանակի տոնակատարություններին մասնակցել էր 2023 թվականի մայիսի 9-ին։
Մանյա Պողոսյան
