Դուք քաղաքական պատվեր եք կատարում․ Ագնեսա Խամոյանը՝ Աննա Վարդապետյանին. ՏԵՍԱՆՅՈՒԹ

«Այս դահլիճում ներկա գտնվող յուրաքանչյուր անձնավորություն գիտի, թե հիմա ինչ է այստեղ կատարվում՝ Հովիկ Աղազարյանը հրաժարվել է կատարել Նիկոլ Փաշինյանի խնդրանքն այսպես կոչված մանդատը վայր դնելու մասով, և Դուք եկել եք նրա հետևից Ազգային ժողով» ,- այս մասին ԱԺ-ում պատգամավոր Հովիկ Աղազարյանին անձեռնմխելիությունից զրկելու հարցի քննարկման ժամանակ գլխավոր դատախազ Աննա Վարդապետյանից դիմեց «Հայաստան» խմբակցության պատգամավոր Ագնեսա Խամոյանը:

Վարդապետյանն, ի պատասխան, ասաց, որ ինքը քաղաքական հայտարարություններ չի անում: «Ես ներկայացրել եմ միջնորդագիր, երրորդ անգամ ստիպված եմ կրկնել, որ միջնորդագրի հետ կապ չունեցող և միջնորդագրի շրջանակներում չներկայացված ապացույցի վերաբերյալ որևէ դիրքորոշում չեմ հայտնելու»,- ասաց գլխավոր դատախազը։

«Դուք քաղաքական հայտարարություններ չեք անում, ներողություն եմ խնդրում, բայց դուք քաղաքական պատվեր եք անում, որովհետև նույն հարցուպատասխանի ժամանակ Նիկոլ Փաշինյանը, էլի բառացի մեջբերում եմ, հայտարարել է՝ ժողովրդավարության բաստիոնը պետք է գտնի լծակներ քաղաքական, բարոյական և այլ լծակներ, նման կարմիր գծեր հատած պատգամավորին ժողովրդի կողմից տրված մանդատից զրկելու համար: Դուք հիմա կատարում եք քաղաքական պատվեր»,- հայտարարեց ընդդիմադիր պատգամավորը։

Հիշեցնենք, որ ԱԺ-ն քննարկում է Գլխավոր դատախազի միջնորդությունը Հովիկ Աղազարյանին անձեռնմխելությունից զրկելու վերաբերյալ։ Աղազարյանին մեղադրանք է առաջադրվել երկու տարբեր դրվագներով։

Մանրամասները՝ տեսանյութում։