Քաղաքականություն
26.03.2025 | 11:42ԱԺ-ն չընդունեց «Հայաստան» խմբակցության հեղինակած ««Պետական կենսաթոշակների մասին» օրենքում լրացումներ կատարելու մասին» նախագիծը։
Մինչ քվեարկությունը «Քաղաքացիական պայմանագիր» խմբակցության ղեկավար Հայկ Կոնջորյանը հայտարարեց, որ 2018 թվականից կառավարությունը նվազագույն կենսաթոշակների ֆոնդն ավելացրել է տարեկան հավելյալ 380 միլիոն դոլարի չափով։ Նրա խոսքով՝ կառավարությունը շարժվում է իր սահմանած թիրախի ուղղությամբ։
Ընդդիմադիր խմբակցության քարտուղար Արծվիկ Մինասյանն էլ ի պատասխան հայտարարեց, որ ՔՊ-ն իր տված խոստուկները չի կատարում։
«Բարձրացվող թոշակները ոչ միայն հեռու են իրենց իսկ տված խոստումներից, այլև Հայաստանի պետական պարտքն այս տարիների ընթացքում աճեցրել են մոտ 7 միլիարդ դոլարով։ Այս պայմաններում հերոսաբար ներկայացնում են, որ գնում են դեպի թիրախը։ Դեմ քվեարկելով այս օրենքի նախագծին՝ դեմ եք քվեարկում ձեր իսկ թիրախին»,-ասաց պատգամավորը։
Իշխանական պատգամավորներն էլ պատասխանեցին, որ ընդդիմության հեղինակած օրինագիծը պոպուլիստական է։ Այնուհետև ընդդիմադիր և իշխանական պատգամավորների միջև թեժ զրույց ծավալվեց կենսաթոշակի բարձրացման շուրջ։
Հիշեցնենք, որ ԱԺ «Հայաստան» խմբակցության հեղինակած ««Պետական կենսաթոշակների մասին» օրենքում լրացումներ կատարելու մաuին» նախագծով առաջարկվում է 2026 թվականի հունվարի 1-ից նվազագույն կենսաթոշակի չափը սահմանել այնպես, որ պակաս չլինի պարենային ամսական զամբյուղի արժեքից, իսկ միջին աշխատանքային կենսաթոշակի չափը պակաս չլինի սպառողական զամբյուղի ամսական արժեքից:
