ԵՄ-ն դառնում է առավել կարևոր գործընկեր անվտանգության ոլորտում. փոխնախարարը՝ Գևորգյանին․ ՏԵՍԱՆՅՈՒԹ

ԵՄ-ն դառնում է առավել կարևոր գործընկեր անվտանգության ոլորտում, այս մասին ԱԺ-ում եվրոպական ինտեգրման հարցերի մշտական հանձնաժողովի նիստում ասաց ԱԳ փոխնախարար Պարույր Հովհաննիսյանը՝ անդրադառնալով «Հայաստան» խմբակցության պատգամավոր Արմեն Գևորգյանի հարցի, թե անվտանգության ոլորտում ԵՄ-ից ի՞նչ ակնկալիքներ ունենք։ ԱԳ ներկայացուցչի խոսքով՝ մեկնարկել են քաղաքական և անվտանգության երկխոսություն Եվրամիության հետ:

«Արդեն տեղի է ունեցել երկու նիստ, քննարկում ենք այլ ձևաչափեր այդ երկխոսության հովանու ներքո, որտեղ պաշտպանության և անվտանգության հարցերի շուրջ առավել ակտիվ պետք է աշխատանքներ սկսվեն։ Պետք է նկատել, որ ԵՄ դիտորդների ներկայություն ՀՀ-ում ևս անվտանգային ոլորտում կարևոր գործոն է»,- ասաց նա:

Եվրաքվեի նախաձեռնող խմբի լիազոր ներկայացուցիչ Արտակ Զեյնալյանն էլ ի պատասխան ընդդիմադիր պատագմավորի հարցի ասաց, երբ Հայաստանը դառնա ԵՄ անդամ, կդառնա նույն անվտանգության համակարգի մաս, ինչ ունի այդ միությունը։

«Այն ապահովությունը, որը կա Եվրոպական միությունում, մենք ակնկալում ենք ԵՄ անդամակցելու գործընթացի ընթացքում ստանալ, որպեսզի այն տարածվի նաև Հայաստանի Հանրապետության վրա։ Անվտանգությունը բազմաբաղադրիչ երևույթ է։ Դա միայն զինված ուժերի կամ պաշտպանության մասին չէ, այլև տնտեսության, ժողովրդավարության և ինստիտուտների, որոնք ապահովում են համապարփակ անվտանգություն։ Դառնալով Եվրոպական միության անդամ կամ ընթանալով այդ ուղղությամբ՝ ակնկալում ենք մտնել այդ անվտանգության հովանոցի տակ»,- ընդգծեց նա։

Մանրամասները՝ տեսանյութում։