17.07.2026 | 17:32
Զելենսկին Թուրքիայի ԱԳ նախարարին շքանշանով է պարգևատրել
Նոր էսկալացիայի վտանգ. Փաշինյանի պատրաստակամությունն ու Ալիևի լռությունը. ՏԵՍԱՆՅՈՒԹ
Քաղաքականություն
20.03.2025 | 19:30
Հայաստանի վարչապետ Նիկոլ Փաշինյանն Ադրբեջանի նախագահ Իլհամ Ալիևին առաջարկում է Երևանի և Բաքվի միջև խորհրդակցություններ սկսել խաղաղության համաձայնագրի համաձայնեցված նախագծի ստորագրման շուրջ։
Փաշինյանը վերջին երկու օրում արդեն 3-րդ նմանատիպ գրառումն է կատարում Ֆեյսբուքում։ Փաստաթղթի համաձայնեցման մասին կողմերի պաշտոնական հայտարարությունից անցել է արդեն 1 շաբաթ, բայց կողմերը դեռ ստորագրման վայրի ու ժամկետների մասին ընդհանուր հայտարարի չեն եկել։ Մինչ Երևանը պայմանագիրը ստորագրելու պատրաստակամություն է հայտնում, Բաքուն նոր պայմաններ է առաջ քաշում։
Հայաստանի ԱԽ քարտուղար Արմեն Գրիգորյանը Կառավարությունում լրագրողների հետ զրույցում հաստատում է, որ Հայաստանը պատրաստ է Ադրբեջանի հետ քննարկել նաև վայրի և օրվա հետ կապված հարցերը։
Տարբեր են խաղաղության ձգտող Հայաստանի և Ադրբեջանի մոտեցումները։ Ալիևի վարչակազմը համաձայնագրի համաձայնեցված լինելու մասին հայտարարելուց անմիջապես հետո տեղեկատվական պատերազմ սկսեց։ Այդ պահից սկսած Բաքվից արդեն 10-րդ հայտարարությունն է հնչում այն մասին, թե հայկական զինուժը կրակում է ադրբեջանական դիրքերի ուղղությամբ։ ՀՀ ՊՆ-ի հակադարձումներին, որ դրանք կեղծիք են, այսօր միացավ նաև ԱԽ քարտուղարը։
Քաղաքագետ Տիգրան Գրիգորյանի խոսքով՝ Ադրբեջանը վերջին օրերին տեղեկատվական ֆոն է ապահովում ինչ-որ գործողության համար, իսկ Երևանը խաղաղության մասին հայտարարություններով փորձում է հնարավոր էսկալացիան կանխել։
Ընդդիմադիր «Հայաստան» խմբակցության պատգամավոր Աննա Գրիգորյանը չի կարծում, թե Փաշինյանի գրառումները կարող են իրավիճակից ելք լինել։
Չնայած խաղաղության մասին խոսակցություններին, համաձայնագրի տեքստի հաստատմանը և միջազգային հանրության ակտիվ արձագանքին՝ Տիգրան Գրիգորյանը, այնուհանդերձ, չի բացառում էսկալացիայի հավանականությունը։
Ադրբեջանի կողմից խաղաղության համաձայնագիր ստորագելու պատրաստակամություն չի տեսնում նաև ընդդիմադիր պատգամավոր Աննա Գրիգորյանը։ Ըստ նրա՝ Ալիևը դեմ է որևէ փաստաթղթի ստորագրմանը, որով խաղաղություն է լինելու տարածաշրջանում։
Նշենք, որ չնայած համաձայնագրի նախագծի տեքստի համաձայնեցված լինելուն՝ կողմերից որևէ մեկը չի հրապարակում ամբողջական տարբերակը, որը բաղկացած է 17 կետից։
Մանրամասները՝ տեսանյութում։
Նարեկ Կիրակոսյան
