02.03.2026 | 13:33
Հայ-իրանական սահմանին առանձնահատուկ շարժ չկա. Արմեն Ղազարյան․ ՏԵՍԱՆՅՈՒԹ
Թուրքիայում կրկին Գերմանիայի քաղաքացի է կալանավորվել
Քաղաքականություն
02.10.2018 | 12:00
Թուրքիայում դարձյալ Գերմանիայի քաղաքացի է կալանավորվել։ Գերմանական մամուլին հղում կատարող թուրքական էլեկտրոնային լրատվամիջոցները տեղեկացնում են, որ 2018թ․ օգոստոսին Քուշադասը քաղաքում ձերբակալվել է Բրաունշվայգի բնակիչ Հյուսեին Մ․-ն, ով հանգստի նպատակով այցելել էր Թուրքիա. տեղեկացնում է ermenihaber-ը:
Հյուսեին Մ․-ն մեղադրվում է «Թուրքիայի նախագահին վիրավորելու» մեջ։ Դատավարությունը կսկսվի հոկտեմբերի 11-ին։
Աղբյուրի համաձայն՝ Հյուսեին Մ․-ն ծնվել է 1976թ․՝ Թունջելիում։ 13 տարեկանում տեղափոխվել է Գերմանիա, իսկ 2012թ․ հետո ունի միայն Գերմանիայի քաղաքացիություն։ Սակայն Թուրքիայի պետական կառույցները նրան Թուրքիայի քաղաքացի են համարում։ Կալանավորված մեղադրյալին թույլ չեն տալիս հանդիպել ոչ գերմանացի դիվանագետների, ոչ էլ իր կնոջ հետ։
Կալանավորվածի եղբայրը լրատվամիջոցների հետ զրույցում նշել է, որ Հյուսեինի տարեկան արձակուրդն արդեն վաղուց սպառվել է, ուստի երկարատև կալանավորման պատճառով վերջինս կարող է զրկվել Գերմանիայի իր աշխատանքից։ Մյուս կողմից, թուրք դատախազները Հյուսեին Մ․-ի համար «նախագահին վիրավորելու» մեղադրանքով ամենախիստ պատիժն են պահանջել։ Այսինքն, եթե մեղադրանքն անփոփոխ մնա, Գերմանիայի քաղաքացին կարող է դատապարտվել 4 տարվա ազատազրկման։
Գերմանիայի արտգործնախարարությունը դեռևս որևէ հայտարարություն չի արել դեպքի առթիվ։
Գերմանական աղբյուրների համաձայն՝ քաղաքական համատեքստում Թուրքիայում անազատության մեջ գտնվող Գերմանիայի քաղաքացիների թիվը հասել է 5-ի։ Անցյալ շաբաթ պաշտոնական այցով Գերմանիայում գտնվող Էրդողանը հանդիպել էր կանցլեր Անգելա Մերկելի և նախագահ Ֆրանկ-Վալտեր Շտայնմայերի հետ։ Հանդիումների ընթացքում օրակարգ էր բերվել նաև Թուրքիայում կալանավորված գերմանացիների հիմնահարցը և պահանջվել էր հրատապ լուծում գտնել խնդրին։
