Էլեկտրաէներգիայի մատակարարներից մեկը փոխկապակցված է մեկ այլ մատակարար ընկերության հետ․ Վարդանյան. ՏԵՍԱՆՅՈՒԹ

ԱԺ տնտեսական հարցերի մշտական հանձնաժողովի նիստում քննարկվեց ՔՊ պատգամավորներ Ծովինար Վարդանյանի և Արուսյակ Մանավազյանի հեղինակած օրինագիծը, որով փոփոխություններ են ուզում կատարել «Էներգետիկայի մասին» օրենքում:

Նախագծի համահեղինակ Ծովինար Վարդանյանն ասաց, որ մեկնարկել է էլեկտրաէներգետիկական շուկայի աստիճանական ազատականացման և շուկայի նոր մոդելի անցման գործընթացը: Նրա խոսքով՝ շուկայի ազատականացման արդյունքում սպառողների համար ստեղծվել է հնարավորություն մինչ այդ գործող միակ մատակարարի՝ «Հայաստանի էլեկտրական ցանցեր» ՓԲԸ-ի փոխարեն ընտրելու նաև  այլ՝ մրցակցային մատակարարների:

«Ներկայում էլեկտրաէներգետիկական շուկային մասնակցության նպատակով լիցենզիա է ստացել շուրջ 22 մատակարար, որոնցից, սակայն, շուկայում փաստացի գործունեություն է ծավալում միայն վեցը, ինչը խնդրահարույց է: Շուկայում գործող վեց մատակարարներից իրենց առևտրի ծավալներով առաջինից երրորդ տեղերում գտնվող ընկերությունների առևտրի ծավալները տարբերվում են ավելի քան հինգ անգամ: Էլեկտրաէներգիայի մատակարարներից մեկը փոխկապակցված է երաշխավորված մատակարարի հետր»,- ասաց նա։

Վարդանյանը հստակեցրեց, որ նախագծով առաջարկում են օրենքով սահմանված՝ էլեկտրաէներգիայի գնման երաշխիքից օգտվող՝ բնական ջրահոսի վրա կառուցված փոքր հիդրոէլեկտրակայաններում, արևային  և  հողմային կայաններում էլեկտրաէներգիա արտադրողներին հնարավորություն տալ առաջիկա երկու տարիների ընթացքում հրաժարվել էլեկտրաէներգիայի գնման երաշխիքից և  մուտք գործել մրցակցային շուկա՝ առանց այդ երաշխիքի վերականգնման իրավունքի:

Պատգամավորը նաև ընդգծեց, որ առաջարկվող իրավակարգավորումը հնարավորություն կտա ընդլայնելու էլեկտրաէներգետիկական շուկայի մրցակցային հատվածում էլեկտրաէներգիա վաճառողների շրջանակը և  վաճառվող էլեկտրաէներգիայի ծավալները՝ խթանելով ազատական շուկայի զարգացումը:

Մանրամասները՝ տեսանյութում։