19.10.2026 | 12:59
Չվճարված հարկերի հետևանքով պետությանը պատճառված շուրջ 39,1 մլն դրամի վնասը կբռնագանձվի․ Դատախազություն
Զոհրաբ Մնացականյանն Ազնավուրի մեծությունը նրա ոգու ու պարզության մեջ է տեսնում
Քաղաքականություն
01.10.2018 | 22:10
ՀՀ արտաքին գործերի նախարար Զոհրաբ Մնացականյանը աշխարհահռչակ շանսոնյե Շառլ Ազնավուրին հիշում է որպես կյանքը և աշխարհը սիրող մարդու: Այս մասին ՀՀ ԱԳ նախարարը նշեց Երևանի Շառլ Ազնավուրի հրապարակում նրա հիշատակին կազմակերպված մոմավառության շրջանակում լրագրողների հետ ճեպազրույցում:
«Կյանք սիրող էր, աշխարհ սիրող, մարդուն սիրող: Այդպես եմ ես իրեն հիշում»,- նշեց նախարար Մնացականյանը՝ հավելելով, որ Ազնավուրի հետ անձնապես շփվելու պատիվ է ունեցել: «Նրա մեծությունը նրա ոգին ու պարզությունն էր»,- ասաց Զոհրաբ Մնացականյանը:
Նախարարն անդրադարձել է շանսոնյեի բարեգործական գործունեությանը եւ Հայաստանի համար նրա ունեցած հեղինակության նշանակությանը եւ հիշել Ազնավուրի անվան հետ կապված մի դրվագ ՄԱԿ-ում ՀՀ դեսպան աշխատած տարիներից:
«Ես դեսպան էի ՄԱԿ-ում՝ Ժնեւում , այն ժամանակ մտնում էի ՄԱԿ, մեքենան մի րոպե կանգնեց դարպասների մոտ, անվտանգության աշխատողներից մեկը ասաց՝ շատ ներողություն, պարող դեսպան, Ձեզ չէինք հանդիպել նախկինում, ո ՞ր երկրի դեսպանն եք: Ես ասացի՝ Հայաստանի Հանրապետության դեսպանն եմ: Ասաց՝ օ՜, Հայաստան, Ազնավուր: Դուք այստեղ կարող եք միշտ մտնել՝ առանց որեւէ խոչընդոտի»,- հիշեց նախարար Մնացականյանը՝ հավելելով, որ սա մի դրվագ է, որը ցույց է տալիս, թե ինչ նշանակություն ուներ Ազնավուրի կապը Հայաստանի հետ:
Հոկտեմբերի 1-ին 94 տարեկան հասակում կյանքից հեռացել է մեծանուն ֆրանսահայ շանսոնյե Շառլ Ազնավուրը:
