25.08.2026 | 21:53
Սեպտեմբերի 1-ից դպրոցների հարակից տարածքներում ոստիկանությունը կանցկացնի ուժեղացված ծառայություն
«Արմավիր» ՔԿՀ-ի 5 դատապարտյալ և կալանավոր ժամանակավոր է դադարեցրել հացադուլը. նրանց է հանդիպել դատախազը
Հասարակություն
15.03.2025 | 16:12
Մարտի 13-ից անժամկետ հացադուլ հայտարարած 5 կալանավոր և դատապարտյալ ժամանակավորապես դադարեցրել են հացադուլը։ Տեղեկությունը FactorTV-ի հետ զրույցում հաստատեց Քրեակատարողական ծառայության հասարակայնության և լրատվության վարչության պետ Նոնա Նավիկյանը։
FactorTV-ն երեկ մանրամասն անդրադարձել էր «Արմավիր» ՔԿՀ-ում հացադուլ հայտարարած անձանց պահանջին, ինչից հետո նրանց էր այցելել կալանավոր Հարություն Մուրադյանի գործը հսկող դատախազը։ FactorTV-ի տեղեկություններով դատախազը համոզել էր հացադուլավորներին դադարեցնել հացադուլը գոնե մինչև երկուշաբթի՝ Մուրադյանի գործով դատական նիստի օրը։ Ըստ ամենայնի, այդ նիստը կալանավորի համար վերջինն է լինելու, երկուշաբթի օրն այդ գործով կհայտարարվի վաղեմության ժամկետի ավարտ և Մուրադյանը կդառնա դատապարտյալ (Հարություն Մուրադյանը նախորդ երկու քրեական գործերով ունի ուժի մեջ մտած դատավճիռներ)։
Մեր աղբյուրների փոխանցմամբ՝ դատախազը Մուրադյանին մի քանի տարբերակ է առաջարկել, սակայն այս պահին FactorTV-ն նպատակահարմար չի գտնում այն հանրայնացնել։
«Հարություն Մուրադյանը և մյուսները հացադուլը դադարեցրել են ժամանակավոր, երկուշաբթի օրը պարզ կդառնա՝ կրկին կդիմեն նման ծայրահեղ քայլի՞, թե՞, ի վերջո, որևէ լուծում կգտնվի կալանավորի համար»,- նշեց FactorTV-ի աղբյուրը։
Հիշեցնենք՝ Հարություն Մուրադյանը կալանավորվել է 2019 թվականի նոյեմբերին։ 3 տարբեր հանցագործությունների համար կալանավորը տարբեր պատժաչափեր է կրել, որից վերջինը նախատեսում էր ազատ արձակում 2024 թվականի նոյեմբերին՝ 5 տարին լրանալուց հետո։ Սակայն, Մուրադյանը դեռևս հունվարին FactorTV-ի հետ զրույցում պատմել էր, որ դատավոր Վարդան Գրիգորյանը 2020 թվականի մայիսի հաստատականն ուղարկել է 2022 թվականին, ինչի պատճառով ստիպված է ևս 2 տարի մնալ անազատության մեջ։
Դատավոր Գրիգորյանը FactorTV-ի հետ զրույցում պարզաբանել էր, որ ինքը հաստատականը ժամանակին է ուղարկել՝ 2020 թվականին, սակայն 2022-ին ՔԿՀ-ից իրեն տեղեկացրել են, որ հաստատական չեն ստացել։ Ինքը նորից է ուղարկել, այնուամենայնիվ այդ ընթացքում Հարություն Մուրադյանը ևս մեկ անգամ է դատապարտվել, սակայն արդեն սխալ ամսաթվով հաստատականի պատճառով, դատավճռում Մուրադյանի կալանքի տակ գտնվելու ժամկետի հաշվարկը սկսվել է 2022 թվականից։
Ռոզա Վարդանյան
