ՀՀ բոլոր ճանապարհները և ենթակառուցվածքները մնալու են մեր ինքնիշխանության և օրենսդրության ներքո․ Միրզոյան․ ՏԵՍԱՆՅՈՒԹ

ԱԺ արտաքին հարաբերությունների մշտական հանձնաժողովի նիստի ժամանակ ԱԳ նախարար Արարատ Միրզոյանը մանրամասներ ներկայացրեց Ադրբեջանի հետ խաղաղության պայմանագրի նախագծի համաձայնեցված տեքստից։

ԱԳ նախարարը հայտարարեց, որ Ադրբեջանի հետ համաձայնեցված տեքստում որևէ դրույթ չկա, այսպես կոչված, միջանցքի մասին։ Նա անդրադարձավ նաև տարածաշրջանային ապաշրջափակմանը՝ նշելով, որ ՀՀ բոլոր ճանապարհները, երկաթուղիները և ենթակառուցվածքները մնալու են ՀՀ ինքնիշխանության և օրենսդրության ներքո։

Հիշեցնենք, որ երեկ Ադրբեջանի արտաքին գործերի նախարար Ջեյհուն Բայրամովն այսօր հայտարարեց, որ Ադրբեջանն ու Հայաստանն ավարտել են «Հայաստանի Հանրապետության և Ադրբեջանի Հանրապետության միջև խաղաղության և միջպետական հարաբերությունների հաստատման մասին համաձայնագրի» տեքստի համաձայնեցման շուրջ բանակցությունները։ Բայրամովը շեշտել էր՝ Հայաստանն ընդունել է պայմանագրի չհամաձայնեցված վերջին երկու կետերի վերաբերյալ ադրբեջանական կողմի առաջարկը։ Այդ հայտարարությունից միայն ժամեր անց ՀՀ արտաքին գործերի նախարարությունը հաստատեց, որ Հայաստանն ընդունում է երկու չհամաձայնեցված հոդվածների վերաբերյալ Ադրբեջանի առաջարկությունները։ «Խաղաղության համաձայնագիրը պատրաստ է ստորագրման։ Հայաստանի Հանրապետությունը պատրաստ է Ադրբեջանի Հանրապետության հետ սկսել խորհրդակցություններ Համաձայնագրի ստորագրման ժամկետների և տեղի շուրջ»,- հայտնեց ՀՀ ԱԳՆ-ն։

Մանրամասները՝ տեսանյութում։