13.12.2025 | 15:13
Երկրպագուներն անկարգություններ են սարքել Հնդկաստանում Մեսիի արձանի բացման ժամանակ․ ՏԵՍԱՆՅՈՒԹ
ՌԴ-ն շարունակում է լռել, ԱՄՆ-ի ճնշման հույս ունենք․ Զելենսկին՝ 30-օրյա հրադադարի հետ կապված Մոսկվայի դիրքորոշման մասին
Քաղաքականություն
13.03.2025 | 19:21
Ռուսաստանը դեռևս բովանդակալից պատասխան չի ներկայացրել 30-օրյա հրադադարի վերաբերյալ։ Կիևը ԱՄՆ-ի կողմից ճնշման հույս ունի՝ Մոսկվային ստիպելու դադարեցնել պատերազմը։ Այս մասին հայտարարել է Ուկրաինայի նախագահ Վլադիմիր Զելենսկին, գրում է ՌԲԿ Ուկրաինան։
Նա նշել է, որ այսօր լսել է ուկրաինական պատվիրակության մանրամասն զեկույցը Սաուդյան Արաբիայում ԱՄՆի ներկայացուցիչների հետ հանդիպման վերաբերյալ։ Զելենսկին ասել է, որ Կիևը հաստատակամ է արագ շարժվել դեպի խաղաղություն և պատրաստ է ազնվորեն կատարել իր աշխատանքն այս հարցում։ Նա նաև ողջունել է ամերիկյան օգնության մատակարարումների և հետախուզական տվյալների փոխանակման վերսկսումը։
Ըստ Զելենսկիի՝ Սաուդյան Արաբիայում բանակցությունների ընթացքում ուկրաինական պատվիրակությունն ամերիկյան կողմին տեղեկացրել է Կիևի սկզբունքային դիրքորոշումների մասին։ ԱՄՆ-ն իր հերթին պատրաստ է կազմակերպել ռազմաճակատում հրադադարի ռեժիմի պահպանման մոնիտորինգի տեխնիկական ասպեկտները։
Միաժամանակ, բանակցությունների ընթացքում քննարկվել է եվրոպական գործընկերների հետ անվտանգության երաշխիքների և հետագա համատեղ քայլերի անհրաժեշտությունը։
«Ցավոք, արդեն մեկ օրից ավելի է՝ աշխարհը Ռուսաստանից բովանդակալից արձագանք չի լսում այն առաջարկների վերաբերյալ, որոնք արվել են։ Եվ դա կրկին հաստատում է, որ հենց Ռուսաստանն է ձգտում շարունակել պատերազմն ու փորձում հնարավորինս հետաձգել խաղաղության սկիզբը։ Հուսով ենք, որ ԱՄՆ-ի ճնշումը բավական կլինի Ռուսաստանին ստիպելու դադարեցնել պատերազմը»,- հայտարարել է Ուկրաինայի նախագահը։
Թարգմանությունը՝ Էմմա Չոբանյանի
