Համաներումը կլիներ այս իշխանության լավագույն մարդասիրական քայլը․ ցմահ դատապարտվածները մեծ հույսեր էին կապում այս իշխանության հետ․ ՏԵՍԱՆՅՈՒԹ

Երբ եկան նոր իշխանությունները, առաջին թեման, որը շատ քննարկվում էր,  համաներման հարցն էր, իշխանության գալուց հետո, սակայն, այդ խոսակցություններն անհետացան և, ի պատասխան հնչեցվող հարցադրումների, Կառավարության կողմից ստացան 0 արձագանք։ Այս մասին այսօր «Ինչո՞ւ է ուշանում համաներումը» թեմայով քննարկման ժամանակ ասաց իրավապաշտպան Ժաննա Ալեքսանյանը։

«Մարդիկ նստած բանտերում սպասում են, նամակներ  են ուղղում արդարադատության նախարարին և վարչապետին, սակայն պատասխան չեն ստանում։ Սա ես անմարդկային վերաբերմունք եմ համարում, քանի որ, եթե չի լինելու համաներում, այդ մասին պետք է ասել, որ  մարդիկ հանգիստ լինեն։ Ի՞նչն է խնդիրը, ինչպե՞ս կարելի է մարդկանց թողնել այդ վիճակում։ Հատկապես ցմահ դատապարտվածները մեծ հույսեր էին կապում նոր իշխանության հետ»,- ասաց իրավապաշտպանը՝ նշելով, որ թեև Արդարադատության նախարարությունից հնչում էին խոստումներ, որ արդեն իսկ պատրաստվում է հատուկ փաթեթ, սակայն ժամանակի ընթացքում դրանք էլ իրականություն չդարձան։

Ժաննա Ալեքսանյանը նկատեց, որ ցմահ դատապարտվածները մեծ հավատով էին լցված իշխանության նկատմամբ և որ այսօր կա հստակ  համաներման պահանջ, հետևաբար անհնար է չանդրադառնալ այս հարցին՝ ներում շնորհել կամ համաներում կիրառել։

«Կարծում եմ, որ իշխանությունները պետք է անեին համաներումը, դա կլիներ ամենամեծ մարդասիրական քայլը, որը կաներ այս իշխանությունը, սա կլիներ լավագույն քայլը, որը կարվեր»,- ասաց նա։

Մանրամասները՝ տեսանյութում։