25.05.2026 | 14:16
«Սպարտակի» ֆուտբոլիստը կոտրել է Ռուսաստանի գավաթը․ ՏԵՍԱՆՅՈՒԹ
Թրամփը հայտարարել է, որ նամակ է գրել այաթոլլա Ալի Խամենեիին՝ առաջարկելով նոր միջուկային գործարք կնքել
Քաղաքականություն
07.03.2025 | 22:10
ԱՄՆ նախագահ Դոնալդ Թրամփը հայտարարել է, որ նամակ է գրել Իրանի գերագույն առաջնորդ, այաթոլլա Ալի Խամենեիին՝ առաջարկելով նոր միջուկային գործարք կնքել, փոխանցում է Meduza.io-ն։
Թրամփի կարծիքով՝ միջուկային ծրագրի դադարեցման շուրջ բանակցություններ սկսելը կլինի «լավագույն» տարբերակը, և ինքը «կնախընտրեր համաձայնության գալ գործարքի շուրջ»:
«Հակառակ դեպքում մենք ստիպված կլինենք ինչ-որ բան ձեռնարկել, քանի որ չենք կարող թույլ տալ, որ նրանք միջուկային զենք ունենան», – հայտարարել է ԱՄՆ նախագահը:
Թրամփն ասել է, որ նամակն ուղարկել է մարտի 5-ին: ՄԱԿ-ում Իրանի մշտական ներկայացուցչությունում մարտի 7-ին հայտարարել են, որ Թեհրանն «այս պահի դրությամբ նման նամակ չի ստացել»:
Հիշեցնենք՝ 2015 թվականին Իրանը և միջազգային միջնորդների խումբը համաձայնության էին եկել, որի շրջանակներում Թեհրանը հրաժարվել է միջուկային զենքի մշակումից պատժամիջոցների վերացման դիմաց: 2018-ին` իր առաջին նախագահական ժամկետի ընթացքում, Թրամփը հայտարարել էր գործարքից ԱՄՆ-ի դուրս գալու մասին՝ Իրանին մեղադրելով համաձայնագիրը խախտելու համար և հայտարարել նոր պատժամիջոցների մասին: 2019 թվականին Թեհրանը հայտարարել էր, որ իր կողմից դադարեցնում է պարտավորությունների կատարումը։
