Ով և ինչպես է որոշելու՝ որ ֆիլմը ֆինանսավորել․ կինոգործիչները նոր նախագծում կոռուպցիոն ռիսկ են տեսնում. ՏԵՍԱՆՅՈՒԹ

«Արջի ծառայություն», «լավամարդ լինելու միջոց», «ծիծաղելի կետերով կանոնակարգ». Հայաստանի կինոգործիչներից շատերը նման կերպ են բնութագրում e-draft հարթակում վերջերս տեղադրված նախագիծը:

Կինեմատոգրաֆիայի ոլորտին պետական ֆինանսավորում հատկացնելու նպատակով մրցույթների կազմակերպման և անցկացման կանոնակարգը հաստատելու մասին նախագծի ամենաբուռն արձագանք գտած կետերից մեկը, օրինակ, վերաբերում է դեբյուտային ֆիլմի տարիքային սահմանափակմանը: Կինոգործիչները այն խտրական ու հակաիրավական են գնահատում։

Կինոքննադատ Րաֆֆի Մովսիսյանը կեսկատակ-կեսլուրջ ասում է՝ Սոկուրովը, Օդիարը, Զվյագինցևն ու Քիառոսթամին բախտավոր են, որ կինոկարիերան չեն սկսել Հայաստանում. կանոնակարգով նրանք չէին արժանանա պետական ֆինանսավորման, քանի որ իրենց դեբյուտային ֆիլմերը նկարահանել են 35 տարեկանից հետո։

«Տարիքային շեմը ոչ միայն խանգարում է կինոգործիչներին, այլև հակասահմանադրական է տարիքային խտրականությամբ որոշել, թե ով իրավունք ունի դեբյուտային կինո նկարել: Ամբողջ աշխարհը գնում է դեպի նոր մասնագիտությունների քաջալերում, այս կտրվածքով դա ուղղակի ծիծաղելի կետ է»,-նշում է Րաֆֆի Մովսիսյանը:

e-draft հարթակում նախագծին կողմ է արտահայտվել քվեարկածների 69%-ը, դեմ՝ 31%-ը: Հայաստանի կինոգործիչների միությունը քվեարկության արդյունքների շուրջ կասկածներ ունի։

«Հայաստանի կինոգործիչների միությունը շահագրգիռ է, որպեսզի կինոոլորտին և դրա զարգացմանը վերաբերող փաստաթղթերը լինեն բացառապես կինոոլորտի զարգացմանը նպաստող, ունենան բարձր լեգիտիմություն, ընդունված լինեն կինոոլորտի մարդկանց մեծ ներգրավվածությամբ եւ հնարավորինս փոխհամաձայնությամբ, և հորդորում է համապատասխան կառույցներին անել հնարավոր ամեն ինչ այդ նպատակին հասնելու համար»,- ասված է միության հայտարարության մեջ:

Մանրամասները՝ տեսանյութում:

Աննա Բաբաջանյան