17.07.2026 | 17:47
Հրանտ-Լեոն Ռանոսը հրաժեշտ է տվել «Բորուսիային», աղբյուրը հայտնել է հարձակվողի նոր ակումբը
Թրամփը Մասկի և DOGE-ի լիազորությունների սահմանափակումներ է մտցրել․ Politico
Քաղաքականություն
07.03.2025 | 14:49
ԱՄՆ նախագահ Դոնալդ Թրամփը հինգշաբթի անձամբ է գումարել իր կաբինետը նիստը՝ հանդես գալու հետևյալ ուղերձով․ «Դուք եք ղեկավարում ձեր բաժինները, ոչ թե Իլոն Մասկը»։ Այս մասին գրում է Politico-ն՝ վկայակոչելով վարչակազմի երկու պաշտոնյայի։
Թրամփն իր վարչակազմի բարձրաստիճան անդամներին ասել է, որ Մասկն իրավասու է առաջարկություններ անել գերատեսչություններին, բայց չի կարող միակողմանի որոշումներ կայացնել անձնակազմի և քաղաքականության վերաբերյալ: Հաղորդվում է, որ հանդիպմանը ներկա է եղել նաև Իլոն Մասկը։
Այս հանդիպումը հաջորդել է պետական ծառայողներին աշխատանքից զանգվածային ազատումներին և նրանց ուղղված սպառնալիքներին Մասկի կողմից, որը ղեկավարում է Կառավարության արդյունավետության վարչությունը (DOGE), ինչը լայն անորոշություն է ստեղծել դաշնային կառավարությունում և նրա աշխատուժի շրջանում:
DOGE-ի գործողությունները դատարաններում բախվում են կատաղի դիմադրության և դեմոկրատ օրենսդիրների ու որոշ հանրապետականների քննադատությանը:
Լրատվամիջոցը գրում է, որ Թրամփի այս ուղերձն առաջին նշանակալի քայլն է Մասկի մանդատը նեղացնելու ուղղությամբ։ Թրամփի նոր ուղեցույցի համաձայն՝ DOGE-ն և նրա անձնակազմը պետք է խորհրդատվական դեր կատարեն, իսկ կառավարության դեպարտամենտների ղեկավարները պետք է վերջնական որոշումներ կայացնեն անձնակազմի, քաղաքականության և իրականացման տեմպերի վերաբերյալ:
Մասկը միացել է քննարկմանը՝ նշելով, որ համաձայն է Թրամփի հրահանգին: Հանդիպման արդյունքներին ծանոթ աղբյուրն ասել է, որ Մասկը խոստովանել է՝ DOGE-ը որոշ սխալ քայլեր է արել։
Սպիտակ տան ղեկավարն ընդգծել է, որ ցանկանում է լավ մարդկանց պահել կառավարությունում և ոչ թե զանգվածաբար վտարել ընդունակ դաշնային աշխատողներին։ Թրամփը հանդիպման մասին գրառում է կատարել Truth Social-ում՝ խոստանալով նմանատիպ հանդիպումներ անցկացնել երկու շաբաթը մեկ անգամ։
«Նախարարները ծանոթանում և հասկանում են տարբեր գերատեսչություններում աշխատող մարդկանց, նրանք կարող են շատ ճշգրիտ հասկանալ, թե ով է մնում, ով՝ գնում։ Նրանց՝ Իլոնի, DOGE-ի և այլ պաշտոնյաների համադրությունը կկարողանա պատմական մակարդակով բաներ անել»,-նշել էր Թրամփը։
Ավելի ուշ Մասկը կիսվել է Թրամփի գրառմամբ՝ այն անվանելով «շատ արդյունավետ հանդիպում»:
Թարգմանությունը՝ Էմմա Չոբանյանի
