13.01.2026 | 16:23
Բացահայտվել են «Հայանտառ»-ի պաշտոնյայի կողմից կաշառք ստանալու դեպքեր. 4 անձի գործով նախաքննությունն ավարտվել է
SpaceX-ի Starship հրթիռը երկրորդ անգամ անընդմեջ պայթել է փորձնական արձակման ժամանակ․ բեկորների պատճառով փակվել են մի շարք օդանավակայաններ․ ՏԵՍԱՆՅՈՒԹ
Քաղաքականություն
07.03.2025 | 13:48
Իլոն Մասկի SpaceX տիեզերական ընկերության Starship հրթիռը կրկին պայթել է Տեխասի Բոկա Չիկա տիեզերակայանից փորձնական արձակումից հետո։ Սա այս տարվա ընթացքում արդեն երկրորդ նման խափանումն է։ Ութերորդ փորձնական թռիչքից շուրջ 10 րոպե անց, երբ բարձրանալուն մնացել է մոտ 20 վայրկյան, կապը հրթիռի հետ կորել է։
CNN-ը գրում է, որ թռիչքից 10 րոպե չանցած Starship նավի վրա, որը շարունակել է ընթանալ դեպի տիեզերք, սկսել են խնդիրներ առաջանալ: Մի քանի շարժիչներ տեսանելիորեն անջատվել են ուղիղ հեռարձակման ընթացքում, և նավը սկսել է շրջվել, մինչև SpaceX-ը կորցրել է կապը դրա հետ:
Ազդանշանի կորուստը տեղի է ունեցել այս առաքելության ընթացքում մոտավորապես նույն կետում, ինչ հունվարի 7-ի թռիչքի ժամանակ, երբ Starship-ը պայթել էր Թերքսի և Կայկոսի բնակեցված կղզիների վրա՝ աղտոտելով կղզիները բեկորներով:
Չի հաստատվել, թե կոնկրետ որտեղ է պայթյունը եղել այս առաքելության ժամանակ, սակայն այն տեսանելի է եղել Ֆլորիդայի որոշ մասերից և Կարիբյան ավազանում՝ ըստ այդ վայրերի բնակիչների հաղորդումների։
Հինգշաբթի երեկոյան Դաշնային ավիացիոն վարչությունը դադարեցրել է թռիչքները դեպի Մայամի, Ֆորտ Լոդերդեյլ, Փալմ Բիչ և Օռլանդո օդանավակայաններ՝ «տիեզերական աղբի վայր ընկնելու» պատճառով։ Ժամանակավորապես դադարեցվել են թռիչքները Ֆորտ Լոդերդեյլ/Հոլիվուդ միջազգային օդանավակայանից և Մայամիի միջազգային օդանավակայանից:
Թարգմանությունը՝ Էմմա Չոբանյանի
