13.01.2026 | 10:43
Ֆեյսբուքյան կեղծ էջերով ԱՄՆ-ում բնակվող հայերի անունից հափշտակել են մոտ 11 մլն ՀՀ դրամ․ ՔԿ
Ռումինիայում պետական դավաճանության կասկածանքով 6 մարդ է ձերբակալվել. նրանք մեղադրվում են ՌԴ-ի հետ կապերի մեջ
Քաղաքականություն
06.03.2025 | 23:06
Ռումինիայի դատախազությունը վեց անձի կալանավորման օրդեր է տվել, որոնք մեղադրվում են կազմակերպված հանցավոր խմբավորում ստեղծելու և պետական դավաճանության մեջ, գրում է Current time-ը։
Ըստ քննության՝ նրանք փորձել են խաթարել Ռումինիայի ինքնիշխանությունն ու անկախությունը քաղաքական ապակայունացման և երկրի պաշտպանունակությունը թուլացնելու միջոցով: Քննիչները պարզել են, որ մեղադրյալներից հինգը հանցավոր խումբ են կազմել դեռ 2023 թվականին։ 2024 թվականին նրանց միացել է վեցերորդ անդամը։
«Ազատություն» ռադիոկայանի ռումինական ծառայության աղբյուրները հաղորդում են, որ խումբը կոչվում է «Վլադ Ցեպեշի հրամանատարության գլխավոր շտաբ»։ Նրա ղեկավարը պաշտոնաթող գեներալ Ռադու Թեոդորուն է, որը վեց մեղադրյալներից մեկն է։
«Խմբի բոլոր անդամներն իրենց նպատակին հասնելու համար իրականացրել են շարունակական, գիտակցված, հրապարակային կամ քողարկված գործունեություն։ Բացի այդ, խմբի անդամները բազմիցս շփվել են օտարերկրյա պետության գործակալների հետ, որոնք տեղակայված են ինչպես Ռումինիայում, այնպես էլ Ռուսաստանի Դաշնությունում»,- ասվում է կազմակերպված հանցավորության և ահաբեկչության հետաքննության վարչության հայտարարության մեջ:
Հունվարին երկու մեղադրյալները մեկնել են Մոսկվա, որտեղ հանդիպել են մարդկանց հետ, որոնք ցանկացել են աջակցել Ռումինիայում իշխանությունը զավթելու իրենց ջանքերում։
Սպասվում է, որ մարտի 6-ին Բուխարեստի վերաքննիչ դատարանը որոշում կկայացնի չորս մեղադրյալների կալանավորման, իսկ մյուս երկուսի համար՝ տնային կալանքի վերաբերյալ։
Ռումինիայի արտաքին գործերի նախարարությունը նախօրեին ՌԴ դեսպանատան ռազմական կցորդին և նրա օգնականին անցանկալի անձ էր հայտարարել և կարգադրել անհապաղ լքել երկիրը։
Թարգմանությունը՝ Էմմա Չոբանյանի
