Ֆիդանը հայտարարել է, որ Թուրքիան պատրաստ է մասնակցել եվրոպական նոր անվտանգությանը՝ Թրամփի դիրքորոշումների ֆոնին

Թուրքիան կոչ է անում Եվրոպային ստեղծել իր անվտանգության շրջանակը, քանի որ ԱՄՆ նախագահ Դոնալդ Թրամփը փորձում է նվազեցնել Վաշինգտոնի դերը եվրոպական պաշտպանությունում: Թուրքիայի արտաքին գործերի նախարար Հաքան Ֆիդանը շեշտել է եվրոպական երկրների միավորման անհրաժեշտությունը՝ ի պատասխան Թրամփի քաղաքականությանը, որը նա որակել է որպես «զգաստացման կոչ բոլորի համար»։

Financial Times-ին տված հարցազրույցում Ֆիդանը հայտարարել է, որ Թուրքիան պատրաստ կլինի մասնակցել եվրոպական անվտանգության նոր ճարտարապետությանը, եթե ՆԱՏՕ-ն լուծարվի, գրում է Turkiye today-ը։

«Ջինը շշից դուրս է եկել, և այն հետ մղելու միջոց չկա։ Նույնիսկ եթե նախագահ Թրամփը որոշի դուրս չգալ Եվրոպայից այս պահին, հնարավոր է, որ ապագայում նմանատիպ հայացքներ և քաղաքական գաղափարներ ունեցող որևէ մեկը մտածի Եվրոպայի անվտանգության մեջ Ամերիկայի ներդրումների կրճատման մասին»,- ասել է Ֆիդանը։

Եվրոպայի կողմից ղեկավարվող անվտանգության նախաձեռնության վերաբերյալ նրա կոչը համընկնում է ՆԱՏՕ-ի այլ անդամների մտահոգությունների հետ՝ անդրատլանտյան պաշտպանությանը ԱՄՆ-ի ապագա հանձնառության վերաբերյալ:

Թուրքիան, որն ունի ՆԱՏՕ-ի մեծությամբ երկրորդ ռազմական հզորությունը ԱՄՆ-ից հետո, պատմականորեն առանցքային դեր է խաղացել դաշինքի անվտանգության ռազմավարության մեջ: Այնուամենայնիվ, Ֆիդանը նշել է, որ փոփոխվող գլոբալ լանդշաֆտը պահանջում է նոր մոտեցում:

Թարգմանությունը՝ Էմմա Չոբանյանի