06.11.2026 | 15:34
Բանկի փլուզում, միլիոնավոր սառեցված հաշիվներ և զանգվածային բողոքներ․ Պարագվայի նախագահը հրաժարական է տվել
56 նախարարների ներկայությամբ Արարատ Միրզոյանը ելույթ է ունենում և մի բառ չի ասում գերիների մասին․ Վարդան Օսկանյան․ ՏԵՍԱՆՅՈՒԹ
Քաղաքականություն
06.03.2025 | 13:01
«56 նախարարների ներկայությամբ Արարատ Միրզոյանը ելույթ է ունենում և մի բառ չի ասում գերիների մասին», – այս մասին իր տեսաուղերձում ասել է ՀՀ նախկին ԱԳ նախարար Վարդան Օսկանյանը: Նա տեսաուղերձով անդրադարձել է Բաքվում ապօրինաբար պահվող հայ գերիների խնդրին:
«Ես զգում եմ, որ մեր իշխանություններն այս հարցն ուզում են ներքաղաքական խնդրի վերածել՝ իրենց դիրքերը պահպանելու ու ամրացնելու կամ իրենց անգործությունը թաքցնելու համար: Այս խնդիրը բոլոր նեղ շահերից վեր խնդիր է, մեր առաջնային հարցը պետք է լինի այդ տղաներին հայրենիք վերադարձնելու հարցը: Իշխանությունները բացարձակ ոչինչ չեն արել առ այսօր, այս վերջին շրջանի փոքր ակտիվությունը, ԱԳ նախարարության հայտարարությունը կամ ԱԳ նախարարի Ժնևի ելությում, ինչ-որ ակնարկ անելն այս հարցին, բավարար չեն և արդյունք են միայն ու միայն վերջին շաբաթներին Հայաստանում ժողովրդի կողմից բողոքի և ինչ-որ տեղ նաև ցասումի հետևանք»,- ասել է Օսկանյանը:
Նրա խոսքով՝ Մալթայում ԵԱՀԿ նախարարների խորհրդի հանդիպման ընթացքում իր ելութում որևէ անդրադարձ չանելով գերիների խնդրին՝ արտաքին գործերի նախարարը մեծ հնարավորություն բաց թողեց:
«ԱԳ նախարարը ելույթ էր ունենում հենց այն կազմակերպությունում, որը ստեղծել է Մինսկի խումբը, որի հնարավորության ներքո երկու տասնամյակից ավելի նրանց ներկայացուցիչները բանակցել են Արցախի, Հայաստանի, Ադրբեջանի ներկայացուցիչների հետ հարցին խաղաղ լուծում տալու համար: Միացյալ Նահանգների, Ֆրանսիայի, Ռուսաստանի բարձր ներկայացուցիչներ բազմիցս եղել են Ստեփանակերտում, հանդիպել են Բակո Սահակյանի, Արկադի Ղուկասյանի, Դավիթ Բաբայանի և մյուսների հետ, բանակցել են Արցախի կարգավիճակի շուրջ: Չէր կարո՞ղ Հայաստանի արտաքին գործերի նախարարը հենց այդ դահլիճում, բոլորի ներկայությամբ հարց տալ այդ մարդկանց», – հարցնում է Օսկանյանը:
«Բակո Սահակյանը Բաքվի բանտում ճնշման, միգուցե խոշտանգումների ներքո ասաց՝ սա մեր ինքնորոշման պայքարն է եղել, օրինական է եղել, և դա իսկապես այդ հարթության վրա պետք է դիտարկել: Բակո Սահակյանն ու մյուսները Բաքվի բանտում շատ ավելի ազատ են ու անկախ, քան դուք՝ ձեր ողջ իշխանությամբ այս արևի տակ ձեր դիվանագիտական իմունիտետով: Դուք անկա՛խ չեք, դուք վախկո՛տ եք, չեք կարողանում այս հարցը բարձրացնել ճիշտ ատյաններում, որովհետև վախեցած եք և գիտեք, որ այս բոլորը ձեր սխալների արդյունք են»,- նշել է նախկին ԱԳ նախարարը:
