Ռուբեն Վարդանյանի փաստաբանը ՀՀ իշխանություններին կոչ է անում ավելին անել՝ Ադրբեջանում պահվող հայերին ազատելու համար

Ադրբեջանում ապօրինի պահվող Արցախի նախկին պետնախարար Ռուբեն Վարդանյանի փաստաբան Ջարեդ Գենսերն անդրադարձել է հայ գերիներին ազատ արձակելու համար ՀՀ իշխանությունների կողմից ձեռնարկվող քայլերին։

«Շատ շնորհակալ եմ, որ ՀՀ ԱԳՆ-ն և նախարար Արարատ Միրզոյանը խոսել են իմ պաշտպանյալ Ռուբեն Վարդանյանի ու  Ադրբեջանից մյուս հայ բանտարկյալների և գերիների ազատության համար։ Սա մեծ բան է։ Վարչապետ Նիկոլ Փաշինյանը ևս շատ ավելին կարող է անել՝ դա իրականացնելու համար։ Մենք աղոթում ենք և խնդրում նրա օգնությունն ու աջակցությունը»,-գրել է Գենսերը X-ի իր միկրոբլոգում։

Նա առաջարկներ է ներկայացրել, թե ինչ կարող է անել Հայաստանը բանտարկյալներին ու գերիներին ազատ արձակելու համար։

Մասնավորապես, հանրային դիվանագիտություն ու հայտարարություններ․ ըստ Գենսերի՝ վարչապետ Փաշինյանը կարող է, արտգործնախարարի և ԱԳՆ հայտարարությունների վրա հիմնվելով, հրապարակային հայտարարություն տարածել, որում կասվի, որ Ադրբեջանի կողմից քաղբանտարկյալների և գերիների ազատ արձակումն առաջնահերթ նշանակության խնդիր է, նրանք պետք է անհապաղ և անվերապահորեն ազատ արձակվեն։ Նա նաև կարող է մամուլի ասուլիս հրավիրել՝ քննարկելու այս բոլոր հարցերը, խոշորագույն լրատվամիջոցներից մեկում հոդված հրապարակել, հանդես գալ բոլոր այն դեպքերում, երբ կարևոր զարգացումներ են լինում։

Փաստաբանն առաջարկում է օգնություն ցուցաբերել ընտանիքներին, ինչպես նաև Ադրբեջանի հետ բանակցել, որի համար վարչապետ Նիկոլ Փաշինյանը կարող է Բաքու հատուկ բանագնաց ուղարկել՝ գերիների ազատ արձակման հարցով բանակցությունների համար։ Բացի այդ, նա կարող է գործակցել համախոհ կառավարության, օրինակ՝ Շվեյցարիայի հետ՝ Հայաստանի շահերն Ադրբեջանում ներկայացնելու համար։ Դա կարող էր արվել Բաքվում այդ երկրի դեսպանատանը «Հայկական շահերի բաժին» ստեղծելու միջոցով:

Փաստաբանն առաջարկում է նաև աջակցության համար դիմել ԱՄՆ-ին, Ֆրանսիային ու ԵՄ-ին, ներգրավել Համաշխարհային կրոնական համայնքին։

Թարգմանությունը՝ Էմմա Չոբանյանի