Եվրոպայի անվտանգությունն անհնար է պատկերացնել առանց Թուրքիայի․ Էրդողան

Թուրքիայի նախագահ Ռեջեփ Թայիփ Էրդողանը հայտարարել է, որ Եվրոպայի անվտանգությունն անհնար է պատկերացնել առանց Թուրքիայի՝ ընդգծելով, որ Եվրամիությանը երկրի անդամակցությունը մնում է ռազմավարական առաջնահերթություն։ նկարայում օտարերկրյա դեսպանների հավաքին ունեցած ելույթում նա ընդգծել է Թուրքիայի անբաժանելի դերը Եվրոպայի կայունության և անվտանգության հարցում, գրում է Turkiye Today-ը։

«Թուրքիան ԵՄ-ին անդամակցելու գործընթացը դիտարկում է որպես ռազմավարական առաջնահերթություն, քանի որ այն Եվրոպայի անբաժանելի մասն է։ Եվրոպայի համար գնալով անհնար է դառնում շարունակել գլոբալ խաղացող մնալ, քանի դեռ Թուրքիան չի զբաղեցնում իր ճիշտ տեղը»,- ասել է Էրդողանը։

Նա կրկնել է Թուրքիայի դիրքորոշումը ԵՄ-ին անդամակցելու հարցում՝ քննադատելով դաշինքի երկակի ստանդարտները։ Էրդողանը պնդում է, որ Թուրքիան երկար ժամանակ եվրոպական նշանակալի տերություն է և պետք է լիովին ինտեգրվի միությանը։

Էրդողանն անդրադարձել է նաև ՄԱԿ-ի Անվտանգության խորհրդի կառուցվածքին՝ պնդելով, որ ԱԽ-ում պետք է վետոյի իրավունք ունենա նաև իսլամական երկիր։

«Պայքարը, որը մենք մղում ենք «5-ից ավելի մեծ աշխարհ» կարգախոսի ներքո, ուղղված է ավելի ընդգրկուն կառույց ստեղծելուն, որը կփոխարինի խնդիրներ ստեղծող համակարգին։ Այսօր ես ուզում եմ սա ևս մեկ անգամ հստակ արտահայտել․ ժամանակն է, որ որոշումների կայացման գլոբալ մեխանիզմները հարմարվեն փոփոխվող գլոբալ պայմաններին: Մահմեդականները, որոնք կազմում են աշխարհի բնակչության մեկ քառորդը, պետք է ներկայացված լինեն որոշումների կայացման գործընթացներում՝ այնպես, ինչպես արժանի են։ ՄԱԿ-ի Անվտանգության խորհրդում վետոյի իրավունք ունեցող իսլամական երկրի ներկայությունն այժմ ավելի շատ անհրաժեշտություն է, քան պահանջ»,- հայտարարել է Թուրքիայի նախագահը։

Թարգմանությունը՝ Էմմա Չոբանյանի