30.04.2026 | 09:45
ՀՀ տարածքում ավտոճանապարհները հիմնականում անցանելի են
Ֆրանսիան հոկտեմբերից Ուկրաինայի հետ բանակցում է ռազմարդյունաբերության համար հանքանյութերի օգտագործման շուրջ
Քաղաքականություն
27.02.2025 | 17:16
Ֆրանսիան Ուկրաինայի հետ քննարկում է իր պաշտպանական արդյունաբերության համար օգտակար հանածոների մշակումը 2024 թվականի հոկտեմբերից։ Այս մասին հայտարարել է Ֆրանսիայի զինված ուժերի նախարար Սեբաստիան Լըկորնյուն։ Franceinfo-ին տված հարցազրույցում նա հայտնել է, որ Ուկրիանայի նախագահ Վլադիմիր Զելենսկին է անցյալ տարվա աշնանը Փարիզ կատարած այցի ժամանակ իր «հաղթականի ծրագրում» ներառել ռեսուրսների հարցը։
Նա հավելել է, որ Զելենսկին «մի շարք առաջարկներ» է արել ոչ միայն ԱՄՆ-ին, այլև Ֆրանսիային։
«Վլադիմիր Զելենսկին և նրա թիմը հասկացան, որ հումքային ռեսուրսների հարցը կարող է դառնալ մեզ հետ կայունություն ստեղծելու գործարքի տարրերից մեկը։ Այսպիսով, նախագահ Թրամփը դա ամբողջությամբ չի հորինել, քանի որ հենց ուկրաինացիներն են հանդես եկել այս նախաձեռնությամբ»,- ասել է Լըկորնյուն:
Այդ օգտակար հանածոներն օգտագործվելու են ռազմական տեխնիկա արտադրելու համար, հավելել է պաշտոնյան։
«Մեր պաշտպանական արդյունաբերությանն անհրաժեշտ կլինի որոշակի քանակությամբ հիմնական հումք մեր սեփական սպառազինության համակարգերի համար, ոչ թե հաջորդ տարի, այլ հաջորդ 30 կամ 40 տարիների ընթացքում»,- ասել է ֆրանսիացի նախարարը:
Ըստ նրա՝ Ֆրանսիան ցանկանում է «դիվերսիֆիկացնել» այս տեսակի հանքանյութի իր ներմուծումը, և նախագահ Էմանուել Մակրոնն իրեն խնդրել է «բանակցությունների մեջ մտնել նաև ուկրաինացիների հետ»։
Ի տարբերություն ԱՄՆ նախագահ Դոնալդ Թրամփի՝ Լըկորնյուն ասել է, որ Ֆրանսիան Ուկրաինայից հանքային ռեսուրսների տեսքով պատերազմի ժամանակ Փարիզի ցուցաբերած օգնության վերադարձ չի պահանջել։
Թարգմանությունը՝ Էմմա Չոբանյանի
