28.04.2025 | 23:29
Ատելության խոսքը ոչ միայն Հայաստանում, այլև ամբողջ աշխարհում ամենավտանգավոր երևույթներից է. ՄԻՊ
Ադրբեջանի Մեջլիսը դժգոհել է ՀՀ-ԵՄ խորհրդարանական գործընկերության կոմիտեի հայտարարությունից
Քաղաքականություն
27.02.2025 | 15:48
Ադրբեջանի Միլլի Մեջլիսը դժգոհություն է հայտնել ԵՄ-Հայաստան խորհրդարանական գործընկերության հանձնաժողովի հայտարարության կապակցությամբ՝ այն գնահատելով, իբր, «զրպարտչական արշավի օրինակ», գրում են ադրբեջանական լրատվամիջոցները։
Նշվում է, թե «այդ հայտարարության անհեթեթ ու անհիմն մեղադրանքները», իբր, հերթական անգամ «բացահայտում են թե՛ Հայաստանի, թե՛ Եվրախորհրդարանի իրական էությունը»։
«Արդյունքում այս հայտարարությունը ևս մեկ անգամ ցույց է տալիս հայկական կողմի ոչ անկեղծ մոտեցումը Ադրբեջանի հետ բանակցային գործընթացում։ Միլլի Մեջլիսը կտրականապես մերժում է ԵՄ-Հայաստան խորհրդարանական գործընկերության հանձնաժողովի կանխակալ և միակողմանի հայտարարությունը, որը խեղաթյուրում է պատմական փաստերը և անարդարացիորեն մեղադրում է Ադրբեջանին։ Նման քայլերը միայն խորացնում են տարաձայնությունները և խաթարում խաղաղության ու հաշտեցման ապահովման ջանքերը։ Եթե Եվրախորհրդարանն իսկապես փորձում է նպաստել Հարավային Կովկասում կայունությանը, ապա այս կառույցը պետք է առաջնորդվի հավասարակշռված և արդար մոտեցմամբ, որը ճանաչում է անցյալի անարդարությունները և չի խրախուսում Հայաստանի ռևանշիստական քաղաքականությունն ու նրա ռազմատենչ ջանքերը»,- ասվում է Մեջլիսի հայտարարության մեջ։
Հավելենք, որ օրերս Երևանում կայացել էր Հայաստան-ԵՄ խորհրդարանական գործընկերության կոմիտեի չորրորդ նիստը, որի արդյունքներով համատեղ հայտարարություն է ընդունվել։
Փաստաթղթում կոչ է արվում Ադրբեջանին՝ հրաժարվել ծայրահեղական դիրքերից և ձեռնպահ մնալ նոր նախապայմաններ առաջադրելուց, որոնք կասկածներ են առաջացնում կայուն խաղաղության հասնելու իր իրական մտադրությունների վերաբերյալ։ Ափսոսանք է արտահայտվում Ադրբեջանի կողմից ԵՄ միջնորդությունը մերժելու և Բրյուսելի գործընթացը դադարեցնելու որոշման, ինչպես նաև Հայաստանում ԵՄ առաքելության (EUMA) հետ համագործակցությունից հրաժարվելու համար, այն նաև դատապարտում է առաքելության դեմ Բաքվի կրկնվող ապատեղեկատվական հարձակումները։
Հայտարարության մեջ ընդգծվում է ԵՄ քաղաքացիական դիտորդական առաքելության հիմնական ներդրումը սահմանային միջադեպերի կանխարգելման և սահմանի հայկական կողմում իրավիճակի մոնիթորինգի գործում։ Նշվում է, որ EUMA-ի ներկայությունը հետևանք է 2022 թվականի սեպտեմբերին Ադրբեջանի կողմից Հայաստանի Հանրապետության տարածքի դեմ իրականացված լայնածավալ ռազմական ագրեսիայի, ինչպես նաև 2021 թվականի մայիսից ի վեր հայկական տարածք ռազմական ներխուժման, կոչ է արվում Ադրբեջանին անհապաղ դուրս գալ Հայաստանի տարածքի բոլոր հատվածներից և հարգել Հայաստանի տարածքային ամբողջականությունը։
Թարգմանությունը՝ Էմմա Չոբանյանի
