09.08.2026 | 22:30
Արթուր Ղարիբյանը հաղթական դուբլ է գրանցել «Զենիթի» դեմ խաղում. ՏԵՍԱՆՅՈՒԹ
Մնացել է մի քանի օր․ Օջալանը շուտով PKK-ին զինաթափման կոչ կանի․ Hurriyet
Քաղաքականություն
26.02.2025 | 22:18
Քրդերի բանտարկված առաջնորդ Աբդուլլահ Օջալանը շուտով Քուրդիստանի աշխատավորական կուսակցությանը (PKK) զինթափման կոչ է անելու։ Այս մասին Hurriyet-ում հրապարակված հոդվածում գրում է Թուրքիայի կառավարության հետ սերտ կապերով հայտնի լրագրող Աբդուլքադիր Սելվին։
Ըստ նրա՝ ակնկալվում է, որ քրդական Ժողովուրդների հավասարության և ժողովրդավարության կուսակցության (DEM) պատվիրակությունը շուտով կայցելի Իմրալըի բանտ, որտեղ բանտարկված է Օջալանը, գործընթացը հեշտացնելու համար:
Ի դեպ, այսօր քրդամետ կուսակցությունը հայտարարել է, որ դիմում են ներկայացրել երրորդ անգամ Օջալանին հանդիպելու համար։
Հաղորդվում է, որ Օջալանի կոչի ժամանակացույցն արագացվել է, և հիմնական զարգացումները սպասվում են մեկ շաբաթվա ընթացքում:
«Մնացել է մի քանի օր, բայց ամենավերջին հնարավոր ամսաթիվը փետրվարի վերջն է կամ մարտի սկիզբը»,- նշում է Սելվին:
Ըստ աղբյուրների՝ Օջալանի ուղերձը լինելու է «կարճ, պարզ և ուղիղ», սակայն ստույգ ձևաչափը մնում է անորոշ։
Արդարադատության նախարար Յըլմազ Թունչն ավելի վաղ հայտարարել էր, որ տեսաուղերձով հայտարարությունը հնարավոր չի լինի, թեև ոմանք պնդում են, որ նման կոչն ավելի համոզիչ կլինի:
Սելվին նշում է, որ Օջալանի կոչն ուղղված է լինելու PKK-ի ղեկավարությանը, այլ ոչ թե Թուրքիային։
«Եթե Քանդիլում և Սիրիայում PKK-ի խմբակցություններն անտեսեն կոչը, սպասվում է, որ ռազմական գործողությունները կսրվեն: Գործողությունները շարունակվում են, սակայն այս անգամ լայնածավալ ռազմական գործողություն կիրականացվի»,- գրում է նա։
Լրագրողը հավելում է՝ եթե DEM կուսակցությունն ու դրա եվրոպական թևը դրական արձագանքեն կոչին, նրանց դիրքորոշումները կգնահատվեն առանձին։ Եթե DEM կուսակցությունն աջակցի կոչին, ապա ձեռք կբերի քաղաքական անկախություն։
Հիշեցնենք, որ ավելի վաղ Թուրքիայի քրդամետ կուսակցության պատվիրակները հանդիպել էին Իրաքյան Քուրդիստանի առաջնորդներին ու քննարկել թուրք-քրդական նոր խաղաղության ծրագիրը։
Թարգմանությունը՝ Էմմա Չոբանյանի
