Թրամփը հայտարարել է 5 մլն դոլար արժեքով «ոսկե քարտերի» ներդրման մասին, որը հնարավորություն կտա ԱՄՆ քաղաքացիություն ստանալ

ԱՄՆ նախագահ Դոնալդ Թրամփը հայտարարել է, որ նախատեսում է առաջարկել «ոսկե քարտ» վիզա՝ 5 միլիոն դոլար արժեքով քաղաքացիություն ստանալու հնարավորությամբ, որը կփոխարինի ներդրողի վիզային, գրում է AP-ն։

«Նրանք լինելու են հարուստ և հաջողակ, մեծ գումարներ են ծախսելու, շատ հարկեր են վճարելու, շատ մարդկանց են աշխատանքի ընդունելու։ Կարծում ենք՝ դա չափազանց հաջողված կլինի։ Մենք պատրաստվում ենք այս քարտի համար շուրջ 5 միլիոն դոլար գին սահմանել, և այն ձեզ կտա «կանաչ քարտի» (Green card) առավելությունները, գումարած՝ դա կլինի քաղաքացիություն տանող ճանապարհ: Եվ հարուստ մարդիկ կգան մեր երկիր՝ գնելով այս քարտը»,- հայտարարել է Թրամփը։

Առևտրի նախարար Հովարդ Լուտնիկն էլ ասել է, որ «Թրամփի ոսկե քարտը» երկու շաբաթվա ընթացքում կփոխարինի EB-5 վիզաներին:

EB-5 վիզաները ստեղծվել են Կոնգրեսի կողմից 1990 թվականին՝ օտարերկրյա ներդրումներ ներգրավելու համար և հասանելի են այն մարդկանց համար, ովքեր շուրջ 1 միլիոն դոլար են ծախսում առնվազն 10 աշխատող ունեցող ընկերության վրա:

Լուտնիկն ասել է, որ «ոսկե քարտը», իրականում՝ «կանաչ քարտ» կամ մշտական ​​օրինական բնակության հնարավորություն, կբարձրացնի ներդրողների մուտքի արժեքը և վերջ կդնի խարդախություններին ու «անհեթեթությանը», որոնք, ըստ նրա, բնութագրում են EB-5 ծրագիրը:

Հարցին՝ արդյո՞ք պատրաստ կլինի «ոսկե քարտեր» վաճառել ռուս օլիգարխներին, Դոնալդ Թրամփը պատասխանել է. «Այո, հնարավոր է։ Ես գիտեմ մի քանի ռուս օլիգարխների, նրանք շատ լավ մարդիկ են»։

Թարգմանությունը՝ Էմմա Չոբանյանի