Չինաստանում ռոբոտներին կարող են զինել զանգվածային ոչնչացման զենքով

Չինացի ռազմական գիտնականներն առաջարկում են մարտական ռոբոտներին զինել ջերմային զենքերով, գրում է South China Morning Post-ը։

Ըստ հրապարակման՝ Չինաստանի Ժողովրդական-ազատագրական բանակի (PLA) վերջին զորավարժությունները քաղաքային շրջաններում մարտական գործողություններ իրականացնելու վերաբերյալ ցույց են տվել, որ միայն թեթև զենքերով զինված անօդաչուները կարող են դժվարություններ ունենալ շենքերում կամ ստորգետնյա բունկերներում թաքնված թշնամիներին ոչնչացնելու համար։

Սիանեում տեղակայված Norinco Group Testing and Research Institute-ի գիտնական Դան Չենգուանի խոսքով՝ քաղաքային շինությունների պայմաններում մարտեր իրականացնելու օպտիմալ կոնֆիգուրացիան իր մեջ ներառում է անօդաչուներ, որոնք հագեցած են ֆոտոէլեկտրոնային և ռադիոլոկացիոն համակարգերով՝ թաքնված թիրախները հայտնաբերելու համար, միևնույն ժամանակ, ցամաքային ռոբոտները հանդես կգան որպես «զրահապատ գազաններ», որոնք կրում են ջերմոբարային զենք՝ ստորգետնյա համալիրները մաքրելու համար։

Նշվում է, որ սա անօդաչու թռչող սարքերի վրա նման սպառազինությունների տեղակայման առումով «Չինաստանի պլանների առաջին պաշտոնական բացահայտումն է»։

Ջերմոբարային զենքերը պայթում են երկու փուլով. նախ՝ ցողվում է դյուրավառ աերոզոլը, որն այնուհետ պայթում է և վերածվում, ինչպես նշում են հեղինակները, «2500 աստիճան Ցելսիուսի հասնող հրե գնդակի», որը «գոլորշիացնում է թիրախները 80 մետր շառավղով և թափանցում մինչև չորս մետր հաստությամբ բունկերներ»։

Պարբերականը, վկայակոչելով ռազմական փորձագետներին, գրում է, որ այնպիսի հզոր արհեստական բանականության մոդելները, ինչպիսին է DeepSeek-ը, փոխում են պատերազմի ճարտարապետությունը, և շուտով մարտի դաշտում կարող են հայտնվել մարդասպան ռոբոտներ։

Թարգմանությունը՝ Տաթև Ֆռանգյանի