08.10.2026 | 23:18
Քննարկվել են ՀՀ-ի և Իրանի մաքսային մարմինների միջև նախնական էլեկտրոնային տվյալների փոխանակման համակարգի գործարկման քայլեր
Ուկրաինային իր սպառազինությունը կբավականացնի մինչև ամառ, եթե ԱՄՆ-ի ռազմական աջակցությունը դադարի․ WSJ
Քաղաքականություն
25.02.2025 | 18:29
ԱՄՆ նախկին նախագահ Ջո Բայդենի պաշտոնավարման ավարտին ուղարկված կամ պատվիրված զենքի և զինամթերքի մեծ խմբաքանակներն Ուկրաինային կբավականացնեն մինչև այս տարվա ամառ։ Այս մասին ասել է նախկին վարչակազմի ԱՄՆ պաշտպանության նախարարի նախկին օգնական Սելեստ Ուոլանդերը, գրել է The Wall Street Journal-ը։
BBC-ի ռուսական ծառայության փոխանցմամբ՝ նրա հետ համաձայնել է նաև ուկրաինացի ռազմական վերլուծաբան Նիկոլայ Բելեսկովը, որը կարծում է, որ խնայողաբար օգտագործելու դեպքում այդ պաշարը կարելի է երկարաձգվել մեկ տարով։
Ուկրաինայի նախագահ Վլադիմիր Զելենսկիի օգնականներից մեկը անանունության պայմանով լրատվամիջոցին ասել է, որ ԱՄՆ-ի մատակարարումների ամբողջական դադարեցումը «վատթարագույն սցենար է»՝ նկատի ունենալով, որ դա դեռևս տեղի չի ունեցել: Այս դեպքում, ըստ նրա, Ուկրաինան ստիպված կլինի մեծացնել սեփական արտադրությունը և ավելի շատ հույս դնել եվրոպական երկրներից մատակարարումների վրա։
The Wall Street Journal-ը գրում է, որ «Եվրոպան պատրաստվում է լրացնել բացը»։ Լրատվամիջոցի եվրոպական աղբյուրների համաձայն՝ 2024 թվականին ԵՄ երկրները, Մեծ Բրիտանիան և Նորվեգիան Ուկրաինային մատակարարել են ընդհանուր 25 միլիարդ դոլարի զենք ու զինամթերք, ինչն ավելի շատ է, քան ԱՄՆ-ն է այդ տարի մատակարարել։
Բացի այդ, Եվրոպան քննարկում է նաև օգնությունը տարեկան 30 միլիարդ դոլարի հասցնելու հարցը և «էականորեն» մեծացրել է հրետանային արկերի արտադրությունը։ Անցյալ տարի ԵՄ երկրներն արտադրել են 1,4 միլիոն արկ, իսկ այս տարի նախատեսում են արտադրել 2 միլիոն: Ուկրաինան իր հերթին ներկայում արտադրում է տարեկան 2,5 միլիոն արկ հրետանու և ականանետների համար։
Սակայն որոշ համակարգեր կարճաժամկետ հեռանկարում չեն կարող համալրվել, քանի որ Եվրոպայում դրանք բավարար քանակությամբ չեն արտադրվում, իսկ որոշ ապրանքների համար ընդհանրապես չեն արտադրվում։ Դա վերաբերում է Patriot համակարգի տարրերին, որոնք կարող են խոցել ռուսական բալիստիկ հրթիռները և ATACMS հեռահար բալիստիկ հրթիռները։
Թարգմանությունը՝ Էմմա Չոբանյանի
