19.02.2026 | 16:35
ԱՄՆ-ը սկսել է Սիրիայից դուրս բերել իր վերջին զորքերը. WSJ
Հնդկական օվկիանոսում վերսկսվել են ավելի քան մեկ տասնամյակ առաջ անհետացած մալազիական MH370 ինքնաթիռի որոնումները
Քաղաքականություն
25.02.2025 | 20:25
Ավստրալիայի արևմտյան ափերի մոտ՝ Հնդկական օվկիանոսում, Malaysia Airlines ավիաընկերության կործանված Boeing 777-200 ինքնաթիռի նոր որոնումներ են սկսվել, որը MH370 չվերթ էր իրականացնում Կուալա Լումպուրից Պեկին 2014 թվականի մարտի 8-ին։
9News հեռուստաալիքի հաղորդմամբ՝ որոնողական աշխատանքներն իրականացնում է ամերիկյան Ocean Infinity ընկերությունը՝ Մալայզիայի կառավարության հետ կնքած պայմանագրով։ Նոր գործողությունը կզբաղեցնի մոտ 15 հազար քառակուսի կմ տարածք և կանցկացվի Ավստրալիայի արևելյան ափին գտնվող Պերթ քաղաքից մոտավորապես 1500 կմ հեռավորության վրա:
Հեռուստաալիքը նշում է, որ որոնողական աշխատանքներն ավելի փոքր տարածքի վրա կենտրոնացնելն այն ավելի նպատակային և մանրակրկիտ կդարձնի նախորդ գործողությունների համեմատ, որոնք ընդգրկում էին մինչև 200 հազար քառակուսի կմ տարածք։
Boeing 777-200 ինքնաթիռը Կուալա Լումպուրից Պեկին էր թռել 2014 թվականի մարտի 8-ին՝ տեղական ժամանակով 00:42-ին։ 40 րոպե անց անձնակազմը վերջին անգամ կապի էր դուրս եկել, իսկ 7 ժամ անց ինքնաթիռն անհետացել էր ռադարներից։ Հայտնաբերվել են մի քանի մանր բեկորներ։ Ուղևորների և անձնակազմի անդամների մարմինները չեն հայտնաբերվել։ 239 մարդ զոհված է համարվում ավիաաղետի հետևանքով։
Թարգմանությունը՝ Տաթև Ֆռանգյանի
