08.09.2026 | 23:30
Պապիկյանը այցելել է ՊՆ ուսումնական կենտրոն, հրամկազմին տրվել են մի շարք հանձնարարականներ
30 երկիր պատրաստ է անվտանգության երաշխիքներ տրամադրել Ուկրաինային․ Մակրոն
Քաղաքականություն
25.02.2025 | 11:55
Ֆրանսիայի նախագահ Էմանուել Մակրոնը Fox News-ին ասել է, որ 30 երկիր պատրաստ է մասնակցել Ուկրաինայի անվտանգության ապահովմանը։ Նա պարզաբանել է, որ պարտադիր չէ՝ զորքերը տեղակայվեն առաջնագծում, բայց ներկա կլինեն «որպես երաշխիք»:
«Ես խոսել եմ Եվրոպայի 30 առաջնորդների և մեր դաշնակիցների հետ, որոնցից շատերը պատրաստ են նման գործարքի մաս կազմել»,- ասել է նա:
Մակրոնի խոսքով՝ այդ երկրները սպասում են ԱՄՆ-ի կողմից աջակցության ազդանշանի՝ Ռուսաստանի կողմից պայմանավորվածությունները խախտելու դեպքում։
Մեծ Բրիտանիայի վարչապետ Քիր Սթարմերը, ըստ WSJ-ի, փետրվարի 27-ին ԱՄՆ նախագահ Դոնալդ Թրամփին կներկայացնի Ուկրաինայում բրիտանական և ֆրանսիական զորքերի տեղակայման պլանի նախագիծը։ Սթարմերը կցանկանար ապահովել ԱՄՆ-ի աջակցությունը, եթե եվրոպացի խաղաղապահները վտանգի տակ լինեն:
Մակրոնը նաև գոհունակություն է հայտնել ԱՄՆ նախագահ Դոնալդ Թրամփի՝ Ուկրաինայի դեմ Ռուսաստանի պատերազմին վերջ տալուն ուղղված քայլեր ձեռնարկելու համար, սակայն ԱՄՆ գերագույն գլխավոր հրամանատարին կոչ է արել «զգույշ լինել» բանակցային գործընթացում։
«Մենք խաղաղություն ենք ուզում: Եվ ես կարծում եմ, որ նախագահ Թրամփի նախաձեռնությունը շատ դրական է: Բայց իմ ուղերձն էր՝ զգույշ եղեք, քանի որ մեզ անհրաժեշտ է Ուկրաինայի համար էական բան»,- ասել է Ֆրանսիայի նախագահը։
Թարգմանությունը՝ Տաթև Ֆռանգյանի
