19.12.2025 | 03:00
Կոնֆերենցիաների լիգա. «Նոայի» հավանական մրցակիցները փլեյ-օֆֆում
Վլադիմիր Պուտինը դեմ չէ Ուկրաինայում եվրոպական զորքերի տեղակայմանը. Թրամփ
Քաղաքականություն
24.02.2025 | 23:38
ԱՄՆ նախագահ Դոնալդ Թրամփն ասել է, որ ՌԴ նախագահ Վլադիմիր Պուտինը դեմ չէ Ուկրաինայում խաղաղ համաձայնագրի շրջանակներում եվրոպական զորքերի տեղակայմանը։ New York Post-ի փոխանցմամբ՝ այս մասին օվալաձև աշխատասենյակում լրագրողներին ասել է Թրամփը՝ ընդունելով Ֆրանսիայի նախագահ Էմանուել Մակրոնին։
«Եթե մենք այդ գործարքը կնքենք, նա չի ձգտի նոր պատերազմի։ Նա չի առարկում։ Բայց ես նրան հատուկ այդ հարցը տվեցի։ Նա դրա հետ խնդիր չունի»,- հավելել է Թրամփը։
Թրամփը հայտարարել է, որ շուտով կարող է հանդիպել Զելենսկու հետ՝ հազվագյուտ մետաղների վերաբերյալ համաձայնագիր ստորագրելու համար, տեղեկացնում է Novayagazeta.eu-ն։
ԱՄՆ նախագահի խոսքով ՝ նա հույս ունի Ուկրաինայի առաջնորդի հետ գործարք կնքել այս կամ հաջորդ շաբաթ: Թե ինչի են հասել կողմերը հիմա, նա չի հստակեցրել։
Թրամփը նաև հայտարարել է, որ Ուկրաինայում պատերազմը կարող է ավարտվել մի քանի շաբաթից: Նա հույս է հայտնել, որ Զելենսկին անձամբ կգա օվալաձև գրասենյակ՝ խաղաղություն ստորագրելու համար։ ԱՄՆ նախագահը նաև ասել է, որ կգա Մոսկվա, «եթե ամեն ինչ կարգավորվի», բայց մայիսի 9-ը շատ վաղ ժամկետ է:
«Պատերազմը կարող է շուտով ավարտվել ։ Մի քանի շաբաթվա ընթացքում: Այո, ես այդպես եմ կարծում: Կարծում եմ, որ մենք կարող ենք դա անել մի քանի շաբաթվա ընթացքում, եթե խելացի լինենք: Եթե մենք խելացի չլինենք, դա կշարունակվի, և մենք կկորցնենք երիտասարդ, գեղեցիկ մարդկանց, ովքեր չպետք է մահանան»,- կարծում է Թրամփը:
Պատասխանելով այն հարցին, թե արդյոք Ուկրաինան պետք է Ռուսաստանին զիջի իր տարածքները, Սպիտակ տան ղեկավարն ասել է՝ «տեսնենք»: Նրա խոսքով՝ Ուկրաինայի անվտանգության հարցով պատերազմի ավարտից հետո կզբաղվեն Եվրոպայի երկրները։
Բացի դրանից՝ ԱՄՆ նախագահը հայտարարել է, որ փորձում է Մոսկվայի հետ տնտեսական զարգացման մի քանի համաձայնագիր կնքել, այդ թվում՝ հազվագյուտ մետաղների վերաբերյալ:
