13.01.2026 | 12:12
Միրզոյան-Ռուբիո հանդիպում կլինի // Կրասնոդար-Երևան չվերթը կրկին չեղարկվել է․ ԼՈՒՐԵՐ
Ադրբեջանը պատրաստ է Պակիստանում առնվազն 2 միլիարդ դոլար ներդնել. Իլհամ Ալիևը՝ Պակիստանի վարչապետին
Քաղաքականություն
24.02.2025 | 23:02
Ադրբեջանի նախագահ Իլհամ Ալիևը Բաքվում Պակիստանի վարչապետ Մուհամմադ Շահբազ Շարիֆի գլխավորած պատվիրակության հետ ընդլայնված կազմով հանդիպման ժամանակ ասել է, որ նրա պետական այցը կամրապնդի երկու երկրների միջև եղբայրական կապերը, գրում են ադրբեջանական լրատվամիջոցները։
«Մենք կշարունակենք աջակցել միմյանց բոլոր միջազգային կառույցներում: Մենք պայմանավորվել ենք մեր շատ հավակնոտ տնտեսական գործողությունների ծրագրի շուրջ։ Այսօր քննարկել ենք մեր տնտեսական համագործակցության գործնական նախագծերը, ներառյալ՝ ներդրումային հնարավորությունները»,- ասել է Ալիևը:
Նրա խոսքով՝ երկու երկրների ղեկավարներն արդեն հանձնարարել են իրենց թիմերին մեկ ամսվա ընթացքում ակտիվ աշխատել Պակիստանում ադրբեջանական ներդրումների վերաբերյալ փաստաթղթերի ստորագրման ուղղությամբ:
«Ադրբեջանը պատրաստ է Պակիստանում տարբեր նախագծերում ներդնել առնվազն 2 միլիարդ դոլար։ Վերջերս արդեն ստացել ենք այդ նախագծերի ցանկը, և մեր թիմերը գնահատում են դրանք։ Ուստի, մենք խնդիր ենք դրել մեկ ամսվա ընթացքում ամեն ինչ վերջնական տեսքի բերել և հաշվետվություն ներկայացնել այս հարցի վերաբերյալ»,- ասել է Ալիևը՝ ընդգծելով, որ կողմերը միշտ «աջակցում են միմյանց միջազգային կառույցներում, վճռականորեն աջակցում մեր երկրների տարածքային ամբողջականությանն ու ինքնիշխանությանը»։
Երկու երկրների միջև նաև տարբեր ոլորտներում համագործակցության փաստաթղթեր են ստորագրվել։
Թարգմանությունը՝ Էմմա Չոբանյանի
