22.02.2026 | 00:10
Արթուր Ավետիսյանը՝ աշխարհի գավաթի հաղթող, Մամիկոն Խաչատրյանը՝ արծաթե մեդալակիր
Թուրքիան պատրաստ է հյուրընկալել Ուկրաինայի հարցով բանակցությունները․ Ֆիդան
Քաղաքականություն
24.02.2025 | 14:02
Թուրքիայի ԱԳ նախարար Հաքան Ֆիդանը հայտարարել է, որ Անկարայում արդյունավետ բանակցություններ է անցկացրել իր ռուս գործընկեր Սերգեյ Լավրովի հետ և մանրամասն քննարկել երկկողմ օրակարգի հարցերը, փոխանցում է TRT Haber-ը։
Համատեղ ասուլիսում նա նշել է, որ մտքեր են փոխանակվել Թուրքիայի և Ռուսաստանի միջև համագործակցությունը զարգացնելու վերաբերյալ, և որ իրենք ձգտում են առավել զարգացնել համագործակցությունը բոլոր բնագավառներում՝ համապատասխան կառույցների ներդրմամբ։
Հիշեցնելով, որ այսօր լրանում է Ռուսաստան-Ուկրաինա պատերազմի երրորդ տարելիցը, Ֆիդանը ասել է. «Մենք ցանկանում ենք, որ մեր երկու հարևաններն էլ ապրեն խաղաղության, հանգստության և բարգավաճման մեջ։ Հույս ունենք, որ այս ճգնաժամին մշտական լուծում կգտնվի։ Թուրքիան առաջին իսկ օրից աջակցել է պատերազմին դիվանագիտական ճանապարհով լուծում գտնելուն։ Հակամարտության սկսվելուց կարճ ժամանակ անց մենք կողմերին առաջին անգամ հավաքել ենք Ստամբուլի Խաղաղության սեղանի շուրջ։ Մենք հաջողությամբ իրականացրեցինք «Սևծովյան հացահատիկի» նախաձեռնությունը»։
Ֆիդանը նաև անդրադարձել է ԱՄՆ-ի կողմից պատերազմը դադարեցնելու նախաձեռնությանը՝ հայտարարելով, որ Անկարան աջակցում է դրան։
«Այսօր, երբ պատերազմը թևակոխում է չորրորդ տարին, ԱՄՆ-ի կողմից նախաձեռնություն կա, որի նպատակն է դադարեցնել պատերազմը բանակցությունների միջոցով: Մենք մեծապես կարևորում ենք ԱՄՆ-ի նոր նախաձեռնությունը՝ որպես արդյունքի վրա հիմնված մոտեցում։ Մենք կարծում ենք, որ լուծումը հնարավոր է գտնել երկու կողմերի մասնակցությամբ բանակցությունների միջոցով։ Այս համատեքստում մենք պատրաստ ենք ցանկացած աջակցություն ցուցաբերել բանակցությունների միջոցով խաղաղության հաստատմանը։ Մենք պատրաստ ենք հյուրընկալել բանակցությունները, ինչպես նախկինում: Մենք նաև կշարունակենք մեր ջանքերը՝ ապահովելու Սև ծովում ազատ նավարկության անվտանգությունը»,-ընդգծել է Թուրքիայի ԱԳ նախարարը։
Նա նաև հայտնել է, որ Լավրովի հետ քննարկել են Սիրիայում տեղի ունեցող զարգացումները, Գազայի հատվածում վերջին իրավիճակը՝ ընդգծելով, որ հրադադարը պետք է մշտական լինի։
Թարգմանությունը՝ Էմմա Չոբանյանի
